BAKI, AzerVoice, Nərmin Ağayeva
Yaponiyanın müdafiə naziri general Nakatani Türkiyəyə rəsmi səfəri zamanı keçirilən görüşdə Türkiyənin müdafiə sənayesi və Bayraktar PUA-ları gündəmə gəlib.
AzerVoice xəbər verir ki, Yaponiyanın müdafiə naziri general Nakatani çərşənbə axşamı Ankarada Türkiyənin milli müdafiə naziri Yaşar Gülər ilə görüşüb.
Yaponiya mətbuatının məlumatına görə, bu, Tokiodan olan müdafiə nazirinin Türkiyəyə ilk rəsmi səfəri olub. Görüş zamanı tərəflər müdafiə sənayesi sahəsində əməkdaşlığı genişləndirmək və yüksək vəzifəli şəxslər arasında müntəzəm məsləhətləşmələr aparmaq barədə razılığa gəliblər.
Rəsmi açıqlamalarda birbaşa qeyd edilməsə də, Japan Times qəzeti Türkiyə istehsalı olan pilotsuz uçuş aparatlarının (PUA) gündəmin əsas mövzusu olduğunu bildirib.
Nakatani səfəri çərçivəsində Türk Aerokosmik Sənayesi (TAI) şirkətini ziyarət edib. Onun bugün də Istanbulda Baykar obyektlərinə və digər müdafiə şirkətlərinə baş çəkəcəyi gözlənilir.
“Japan Times”ın hesabatında iddia edilir ki, Yaponiya Müdafiə Nazirliyi 2026-cı maliyyə ili büdcəsindən pilotsuz uçuş aparatlarını sürətlə inventarına əlavə etmək üçün 200 milyard yen (təxminən 1,4 milyard dollar) ayırmağı planlaşdırır. Tokionun rekord büdcə tələbi olan 8,8 trilyon yen, dronlara investisiyaları vurğulayır. Məqsəd 2027-ci maliyyə ilinin sonuna qədər Yaponiya Özünümüdafiə Qüvvələrini hava, dəniz və sualtı pilotsuz təyyarələrlə təmin etməkdir.
Bu kontekstdə Yaponiya ABŞ və Avstraliya kimi ölkələrdən, eləcə də Türkiyədən pilotsuz təyyarələrin alınmasını nəzərdən keçirir. Bununla belə, Yaponiya mətbuatının yazdığına görə, Baykar istehsalı olan PUA-lar Yaponiyada xüsusi maraq doğurub.
Yaponiyanın pilotsuz təyyarələrin alınmasını sürətləndirməsi Çinin bölgədə artan hərbi fəallığından və Ukraynadakı müharibənin dərslərindən qaynaqlanır. İHA-ların, xüsusən də Ukraynada, müharibənin xarakterini dəyişməyə təsiri Tokionun bu sahədə strategiyasını formalaşdırıb. “Keyfiyyətdən çox kəmiyyət” siyasətini qəbul edən Yaponiya mümkün qədər tez yüzlərlə pilotsuz uçan aparat əldə etməyi hədəfləyir.
Tokio hökuməti uzunmüddətli perspektivdə öz istehsalını artırmaq məqsədi ilə xarici istehsalçılardan almağı planlaşdırır. May ayında keçirilən müdafiə sərgisində Mitsubishi Heavy Industries, Kawasaki Motors və Subaru kimi böyük şirkətlər öz dron texnologiya məhsullarını nümayiş etdiriblər. Müdafiə Nazirliyi də döyüş meydanında süni intellekt və pilotsuz uçuş aparatlarından istifadə üzrə xüsusi işçi qrupu yaradıb.
Yaponiya Xarici İşlər Nazirliyi yerli şirkətlərin istehsal etdiyi ikili təyinatlı dronların ixracını da nəzərdən keçirib. Bildirilir ki, Tokionun hərbi yardım proqramında iştirak edən bir çox ölkə Yaponiya istehsalı olan pilotsuz sistemlərə maraq göstərib.
Türkiyənin müdafiə sənayesindəki irəliləyişi təkcə region ölkələrinin deyil, texnologiya nəhəngi Yaponiyanın da diqqətini çəkib. Başda Baykar olmaqla türk şirkətləri qlobal rəqabətdə ən yüksək səviyyəyə çatdıqca, Ankara-Tokio xəttində atılan bu addım türk PUA-larının dünya səhnəsində strateji dəyərini bir daha nümayiş etdirib.
