BAKI, AzerVoice, Nailə Babazadə
Türkiyənin Nəqliyyat və İnfrastruktur naziri Abdulkadir Uraloğlu, Türkiyə ilə Suriya arasında fasiləsiz beynəlxalq quru yol daşımalarının 13 ildən sonra yenidən başladığını bildirib.
AzerVoice xəbər verir ki, Uraloğlu verdiyi yazılı açıqlamada Türkiyə ilə Suriya arasındakı quru yolu daşımaları ilə bağlı məlumat verib. Uraloğlu iki ölkə arasında daşımaların bir müddətdir fasiləli şəkildə həyata keçirildiyini xatırladıb.
"Türkiyə ilə Suriya arasında 13 il fasilədən sonra fasiləsiz beynəlxalq quru yolu daşımaları yenidən başladı. Dünən Cilvəgözü Sərhəd Qapısından 4 yük maşını Mersindən Hələbə, 3 yük maşını isə İdlibdən Mersinə getmək üçün keçid etdi." - deyə Uraloğlu vurğulayıb.
Uraloğlu bildirib ki, Suriyada 2011-ci ildə başlayan daxili qarşıdurmalar səbəbilə daşımalar əvvəlcə dayanma nöqtəsinə gəlib, daha sonra isə tamamilə dayandırılıb. Bu illər ərzində sərhəd qapısındakı yüklər yalnız yük dəyişdirmə üsulu ilə daşınıb.
Nazir əlavə edib ki, 2024-cü ilin dekabrında Suriyada baş verən inkişaflardan sonra daşımaların yenidən başlaması üçün prosesə start verilib. 27–29 iyun tarixlərində İstanbulda keçirilən Qlobal Nəqliyyat Dəhlizləri Forumu çərçivəsində Suriya ilə quru yol daşımaları sahəsində anlaşma memorandumu imzalanıb.
Uraloğlu, 9 iyulda Cilvəgözü Sərhəd Qapısında texniki səviyyədə görüş keçirildiyini və həmin görüşdə keçid şərtlərinin müəyyənləşdirildiyini bildirərək, bu gün artıq sahədə əməli mərhələyə keçildiyini vurğulayıb.
Eyni zamanda, Uraloğlu daşımaların yenidən başlaması ilə Türk və Suriya nömrə nişanlı nəqliyyat vasitələrinin sərhəddə yük dəyişdirməyə ehtiyac qalmadan birbaşa təyinat nöqtələrinə çatacağını bildirib.
