BAKI, AzerVoice, Nərmin Ağayeva
İstanbul Hava Limanı 18-24 avqust tarixlərində gündəlik orta hesabla 1635 uçuşla Avropanın ən işlək hava limanı olub.
AzerVoice xəbər verir ki, Avropa Hava Naviqasiyasının Təhlükəsizliyi Təşkilatı (EUROCONTROL) 18-24 avqust tarixlərini əhatə edən “Avropa Aviasiya Hesabatı”nı dərc edib. Hesabata əsasən, İstanbul Hava Limanı bu dövrdə gündəlik 1635 uçuşla Avropanın ən sıx hava limanları siyahısında liderliyi ələ keçirib.
Hesabatda qeyd olunur ki, İstanbul Hava Limanını gündəlik 1450 uçuşla Amsterdam Hava Limanı, 1432 uçuşla Paris Şarl de Qoll Hava Limanı, 1384 uçuşla Frankfurt Hava Limanı və 1346 uçuşla London Hitrou Hava Limanı izləyib. Bu göstəricilər İstanbulun Avropa aviasiya bazarında mühüm mövqeyini bir daha təsdiqləyir.
Bundan əlavə, Türkiyənin turizm mərkəzlərindən olan Antalya Hava Limanı da siyahıda yüksək yer tutaraq gündəlik 1055 uçuşla Avropanın ən işlək 8-ci hava limanı kimi qeydə alınıb.
Qeyd edək ki, İstanbul Hava Limanının bu uğuru onun müasir infrastrukturu, geniş uçuş şəbəkəsi və Türkiyənin qlobal aviasiya mərkəzi kimi artan rolu ilə bağlıdır.
