BAKI, AzerVoice, Nailə Babazadə
Türkiyə Xarici İşlər Nazirliyi, İsrailin Qəzza şəhərində quru əməliyyatı başlatması ilə bağlı yazılı açıqlama yayıb.
AzerVoice xəbər verir ki, açıqlamada, İsrailin hücumları qətiyyətlə pislənib, və qeyd olunub ki, bu quru əməliyyatı, bir milyondan çox fələstinlinin sığındığı Qəzza şəhərində davam edən qətliamların daha da şiddətlənməsinə səbəb olacaq.
Həmçinin vurğulanıb ki, əməliyyat yüz minlərlə fələstinlinin bir daha yerindən-yurdundan didərgin düşməsinə gətirib çıxaracaq və bölgədəki insani böhranı daha da dərinləşdirəcək.
Beynəlxalq ictimaiyyətin hazırda əsir-məhbus mübadiləsi və fasiləsiz humanitar yardımın çatdırılmasını təmin edəcək atəşkəs razılaşması üçün səylər göstərdiyi bir dövrdə, belə bir əməliyyatın həyata keçirilməsi, İsrailin atəşkəslə maraqlanmadığını bir daha nümayiş etdirir, – deyə açıqlamada qeyd olunub.
Nazirlik, Qəzzada təcili atəşkəsin təmin olunmasının vacibliyini vurğulayaraq, bu istiqamətdə BMT Təhlükəsizlik Şurası başda olmaqla beynəlxalq ictimaiyyətin üzərinə düşən məsuliyyətləri tərəddüdsüz şəkildə yerinə yetirməsinin zəruriliyini bildirib.
“Bu məqsədlə beynəlxalq hüquqa hörmət edən ölkələrlə əməkdaşlığımızı davam etdirəcəyik.” - deyə sonda qeyd edilib.
