TEKNOFEST İstanbul 1 milyon ziyarətçi ilə rekorda imza atıb

Türkiyənin Sənaye və Texnologiya Nazirliyi ilə Türkiyə Texnologiya Komandası Vəqfinin (T3 Vəqfi) təşkilatçılığı ilə keçirilən festivalda bu il 58 əsas və 137 alt kateqoriya üzrə yarışmalar keçirildi. Yarışmalara 565 mindən çox komanda və 1,1 milyon iştirakçı müraciət etdi. Final mərhələsinə yüksələnlər isə ümumilikdə 65 milyon lirədən çox mükafatla təltif olundu.

22 Sentyabr 2025 15:52

BAKI, AzerVoice, Fərid Mikayılov

Türkiyənin texnologiya və elm sahəsində ən böyük tədbirlərindən biri olan TEKNOFEST 2025, 17–21 sentyabr tarixlərində İstanbul Atatürk Hava Limanında keçirildi.

AzerVoice xəbər verir ki, dünyanın ən böyük aviasiya, kosmos və texnologiya festivalı bu il 1 milyon 32 min nəfər ziyarətçini bir araya gətirib.

Festivalın üçüncü günündə tədbirə qatılan Rəcəb Tayyib Ərdoğan, TEKNOFEST-in gənclərin özgüvəni və layihələri ilə Türkiyənin gələcəyini formalaşdırdığını bildirib.

“TEKNOFEST-in 13-cüsünü həyata keçirməyin qürurunu yaşayırıq. Gənclərimizin ortaya qoyduğu əsərlər böyük və güclü Türkiyənin bünövrəsini qoyur”- deyə o bildirib.

Ərdoğan texnologiya yarışmalarında qalib gələn gənclərə mükafatlarını da təqdim edib.

Beş gün davam edən festival çərçivəsində SOLOTÜRK və Türk Yıldızlarının uçuş nümayişləri, ATAK helikopteri, Hürkuş təyyarəsi, Anka, Bayraktar TB2, TB3 və Akıncı PUA-larının səmadakı şouları ziyarətçilərə təqdim olundu. Bununla yanaşı, sərgilərdə milli dəniz, quru və hava vasitələri nümayiş etdirildi.

Festivalın bağlanışında çıxış edən Prezident köməkçisi Cevdet Yılmaz, Türkiyənin gələcəyi üçün texnologiya istehsalının strateji əhəmiyyət daşıdığını vurğulayıb.