BAKI, AzerVoice, Nailə Babazadə
Türkiyə Xarici İşlər Nazirliyinin sözçüsü Öncü Keçeli Yunanıstanın Avropa Birliyi (AB) Dəniz Məkan Planlama (DMP) Platforması vasitəsilə Türkiyənin dəniz səlahiyyət zonalarını pozan bir xəritəni qəbul etdirməyə çalışmasına sərt etiraz edib.
AzerVoice xəbər verir ki, Sözçü sosial media hesabında açıqlama verərək Türkiyənin Birləşmiş Millətlər Təşkilatının (BMT) tövsiyələrinə uyğun aparılan Dəniz Məkan Planlama işlərini yaxından izlədiyini xatırladıb. O qeyd edib ki, Türkiyə öz milli DMP-sini 16 aprel 2025-ci ildə elan edib və 12 iyun 2025-ci ildə UNESCO Hökumətlərarası Oşinografi Komissiyasına təqdim edib.
Keçeli bildirib ki, Avropa Komissiyasının DMP Platformasının internet saytında yerləşdirilmiş və Egey dənizi ilə Şərqi Aralıq dənizində Türkiyənin dəniz səlahiyyət zonalarını pozan Yunan DMP xəritəsi “səlahiyyətli Yunanıstan orqanları”na istinad edilərək yenilənib.
“Beynəlxalq dəniz hüququnun əsas prinsiplərini gözardı edən Yunanıstan, Şərqi Aralıq dənizində rəsmi elan etmədiyi münhasir iqtisadi zonanı (MEB) DMP xəritəsini vasitə kimi istifadə edərək AB üzərindən qəbul etdirməyə çalışır. Ölkəmiz bu qeyri-hüquqi addımı rədd edir.” - deyə Keçəli qeyd edib.
“Türkiyə 18 mart 2020-ci ildə Şərqi Aralıq dənizindəki qitə şelfinin xarici sərhədlərinə dair hüquqi mövqeyini tam şəkildə BMT-yə təqdim edib. Bu baxımdan, Yunan DMP xəritəsində göstərilən sözde MEB Türkiyənin qitə şelfinə daxildir.” - deyə Keçeli əlavə edib.
Sözçü bildirib ki, Yunanıstanın bu MEB təsəvvürləri və qonşuları ilə sərhədləndirmədiyi qitə şelfinin xarici sərhədlərini DMP xəritəsinə daxil edərək qanuni etmək cəhdləri beynəlxalq hüquqa zidd və nəticəsizdir.
