Bakı, AzerVoice, Orxan Qədirzadə

Türkiyə Prezidenti Rəcəb Tayyib Ərdoğan Nazirlər Kabinetinin Ankara Beştəpədə keçirilən iclasından sonra verdiyi açıqlamada ölkənin müdafiə sənayesində əldə olunan irəliləyişləri, xüsusilə də “Kızılelma” pilotsuz döyüş təyyarəsinin dünya aviasiyasındakı “tarixi nailiyyətini” diqqətə çatdırıb.

AzerVoice xəbər verir ki, prezident bildirib ki, qlobal sistemdəki çatların dərinləşdiyi, bölgədə müharibə, siyasi və iqtisadi dalğalanmaların ara vermədiyi bir dövrdə Türkiyə sabitlik, sülh və təhlükəsizlik adası olaraq mövqeyini qorumağı bacarır. Onun sözlərinə görə, Türkiyə ətrafındakı qeyri-sabitlik fonunda region proseslərinin mərkəzində yerləşir və bütün çağırışlara baxmayaraq inkişaf xəttini davam etdirir.

Ərdoğan çıxışı zamanı milli müdafiə sənayesində əldə edilən uğurları xüsusi vurğulayaraq bildirib:
“Keçən həftə sonu ‘Kızılelma’ pilotsuz döyüş təyyarəmiz dünya aviasiyası tarixində tarixi bir irəliləyişə imza atdı.”

Türkiyə lideri həmçinin iqtisadi göstəricilərə toxunaraq ölkədə ümumi inkişaf dinamikasının gücləndiyini qeyd edib. O bildirib ki, milli gəlirin 238 milyard dollardan 1,5 trilyon dollara yüksəlməsi ölkənin son illərdəki ən böyük iqtisadi sıçrayışlarından biridir. 2028-ci il üçün hədəfin 1,9 trilyon dollarlıq ÜDM olduğunu qeyd edən Ərdoğan TÜİK-in elan etdiyi 3,7 faiz üçüncü rüb artımının doğru istiqamətdə irəlilədiklərini göstərdiyini deyib.

Prezident əlavə edib ki, hökumət terrorun aradan qaldırılması istiqamətində qətiyyətini davam etdirir və bunun ölkənin iqtisadi yüksəlişi, ictimai barış və qardaşlıq üçün ən böyük maneələrdən birini aradan qaldıracağına inanır.

Avropa İttifaqına üzvlüklə bağlı danışan Ərdoğan bildirib ki, bütün maneələrə baxmayaraq, tamhüquqlu üzvlük Ankaranın strateji prioriteti olaraq qalır.

Regiondakı təhlükəsizlik məsələlərinə də toxunan dövlət başçısı Rusiya–Ukrayna müharibəsinin Qara dənizdə gəmiçilik təhlükəsizliyinə ciddi təhdid yaratdığını bildirib:
“Xüsusi iqtisadi zonamızda ticarət gəmilərinə edilən hücumlar vəziyyətin təhlükəli şəkildə kəskinləşdiyini göstərir. Bu hücumları heç bir şəkildə qəbul edə bilmərik.”

Ərdoğan çıxışını Türkiyənin həm regional, həm də qlobal çağırışlar qarşısında güclənərək irəlilədiyini vurğulayaraq tamamlayıb.