BAKI, AzerVoice, Nailə Babazadə
Türkiyə Prezidenti Rəcəb Tayyib Ərdoğan Fransa Prezidenti Emmanuel Makron ilə qarşı tərəfin istəyi əsasında telefon danışığı həyata keçirdi. Görüş zamanı Türkiyə-Fransa ikitərəfli münasibətləri, Ukrayna-Rusiya münaqişəsi, həm regional, həm də qlobal məsələlər müzakirə olundu.
AzerVoice xəbər verir ki, Ərdoğan danışıq zamanı Türkiyə ilə Fransa arasındakı əməkdaşlığın inkişaf etdirilməsinin vacib olduğunu vurğuladı və bu məqsədlə addımların davam etdiriləcəyini bildirdi. O, Türkiyənin Ukrayna ilə Rusiya arasındakı müharibənin ədalətli və davamlı sülh yolu ilə sona çatması üçün maksimum səylər göstərdiyini qeyd etdi.
Ərdoğan, İstanbul prosesinin canlandırılması üçün tərəflərlə əlaqələrin davam etdiyini və Türkiyənin mümkün qədər tez sülhün bərqərar olması üçün əlindən gələni etməyə hazır olduğunu bildirdi. O, diplomatik yolların sülhə nail olmaq üçün ən effektiv vasitə olduğunu vurğuladı və Türkiyənin atəşkəsin təmin olunması və sonrakı mərhələlərdəki səylərə dəstəyinin artacağını, qlobal sülhə təhlükə yarada biləcək addımlardan uzaq durulmasının isə sülh təşəbbüslərinə töhfə verəcəyini söylədi.
Görüşdə həmçinin Qafqaz, Qəzza və Suriyadakı son vəziyyət də müzakirə olunub.
