BAKI, AzerVoice, Nailə Babazadə
Türk müdafiə sənayesinin aparıcı şirkətlərindən olan ASELSAN son dövrlərdə əldə etdiyi ixrac nailiyyətləri ilə bu ili rekord göstəricilərlə başa vurmağa hazırlaşır.
AzerVoice xəbər verir ki, dünyanın ən nüfuzlu müdafiə sənayesi reytinqlərindən biri sayılan “Defense News Top 100” siyahısında 42-ci yerdə qərarlaşan ASELSAN ilk 30-luğa daxil olmaq məqsədilə fəaliyyətini davam etdirir.
Bu hədəfə çatmaqda yüksək əlavə dəyər yaradan ixrac mühüm rol oynayır.
ASELSAN-ın ixrac sahəsində atdığı addımlar son illərdə xarici satışların və ixracyönlü qalıq sifarişlərin artımında öz müsbət əksini tapıb.
Şirkətin ictimaiyyətə açıqlanan 9 aylıq maliyyə göstəricilərinə əsasən, bu il çoxsaylı ixrac müqavilələri imzalanıb və 1 milyard 448 milyon ABŞ dolları məbləğində xarici satış mənbəli qalıq sifariş portfeli formalaşdırılıb.
Bu göstərici ötən ilin eyni dövrü ilə müqayisədə 171 faiz artım deməkdir. Yeni imzalanan müqavilələrin təxminən 25 faizi isə birbaşa və dolayı yolla xarici satışları əhatə edir.
