BAKI, AzerVoice, Orxan Qədirzadə
Türkiyə Prezidenti Rəcəb Tayyib Ərdoğanın imzaladığı qərarla kabinetdə baş tutan dəyişiklikdən sonra yeni nazirlər parlamentdə and içərək vəzifələrinin icrasına başlayıblar.
AzerVoice xəbər verir ki, İstanbul Cümhuriyyət Baş prokuroru vəzifəsindən Ədliyyə naziri postuna təyin olunan Akın Gürlek və Ərzurum valisi vəzifəsindən Daxili İşlər naziri təyin edilən Mustafa Çiftçi and içmək üçün Türkiyə Böyük Millət Məclisinə (TBMM) gəliblər.
Konstitusiyanın 106-cı maddəsinə uyğun olaraq keçirilən andiçmə mərasimi gərgin anlarla yadda qalıb. Ədliyyə naziri Akın Gürlek and içmək üçün kürsüyə dəvət olunduğu zaman Cümhuriyyət Xalq Partiyasının (CHP) millət vəkilləri kürsüyə doğru yürüş edərək andiçməyə mane olmağa çalışıblar. Müxalifət qrupunun bu addımı parlamentdə gərginliyi pik həddə çatdırıb.
Məlumata görə, nazirlərin and içməsinə mane olmağa çalışan CHP-li deputatlar ilə AK Partiya təmsilçiləri arasında qarşıdurma və əlbəyaxa dava yaşanıb. Yaranmış xaosa baxmayaraq, təhlükəsizliyi təmin etmək üçün AK Partiyalı deputatlar kürsünün ətrafında canlı sədd qurublar. Hər iki nazir AK Partiyalı vəkillərin yaratdığı bu mühafizə halqası daxilində öz andlarını içərək vəzifələrinin icrasına başlayıblar.
