BAKI, VOA, Nailə Babazadə
Türkiyənin Enerji və Təbii Sərvətlər naziri Alparslan Bayraktar Türkiyə ilə Cənubi Koreya arasındakı ikitərəfli ticarət həcminin 2025-ci il etibarilə 11 milyard dollara çatdığını açıqlayıb.
VOA xəbər verir ki, Türkiyə-Cənubi Koreya İqtisadi və Texniki Əməkdaşlıq üzrə Qarışıq Komissiyanın 9-cu iclasında çıxış edən nazir iki ölkə arasındakı münasibətlərin sadəcə iqtisadi deyil, həm də Koreya Müharibəsindən gələn tarixi qardaşlıq bağlarına dayandığını vurğulayıb. O bildirib ki, gələn il diplomatik əlaqələrin qurulmasının 70-ci ildönümü qeyd olunacaq və bu, tərəfdaşlığın daha yüksək mərhələyə daşınması üçün mühüm məsuliyyət yaradır.
Nazir Bayraktar Türkiyənin Cənubi Koreya şirkətləri üçün Avropa, Yaxın Şərq və Orta Asiya bazarlarına çıxış baxımından güclü bir istehsal və ixrac mərkəzi olduğunu qeyd edib. O, gələcək əməkdaşlıq üçün prioritet sahələri belə sıralayıb:
"Xüsusilə nüvə enerjisi, süni intellekt, yarımkeçiricilər, batareya texnologiyaları, kritik minerallar, innovasiya və bərpa olunan enerji kimi strateji sahələrdə birgə layihələrin inkişaf etdirilməsini prioritet hesab edirik."
Cənubi Koreya Prezidenti Li Ce Myunqun Türkiyəyə səfəri zamanı Rəcəb Tayyib Ərdoğanla görüşündə ortaya qoyulan vizyonun əlaqələrə yeni təkan verdiyini deyən nazir, Azad Ticarət Sazişinin faydalarını "qazan-qazan" prinsipi ilə artırmağı hədəflədiklərini bildirib. Nazir Bayraktar bu toplantının ticarətdən enerjiyə, nəqliyyatdan kənd təsərrüfatına qədər bir çox sahədə ölçülə bilən və davamlı töhfələr verəcək yeni bir dövrün başlanğıcı olacağına inandığını ifadə edib.
