BAKI, VOA, Nailə Babazadə
Türkiyə təhlükəsizlik mənbələri İrandan atılan ballistik raketlərin NATO hava hücumundan müdafiə sistemləri tərəfindən zərərsizləşdirilməsindən sonra Ankaranın rəsmi mövqeyinə dair mühüm açıqlamalar verib.
VOA xəbər verir ki, mənbələr vurğulayıb ki, Türkiyə hazırda davam edən regional müharibənin tərəfi deyil və münaqişənin içinə çəkilməmək üçün son dərəcə ehtiyatlı və soyuqqanlı siyasət yürüdür. Bölgədə yeni gərginlik xətlərinin yaranmaması üçün məsuliyyətlə hərəkət edən Ankara İran tərəfinə sözügedən hücuma görə məsuliyyət daşıyanların dərhal müəyyən edilməsi və lazımi tədbirlərin görülməsi barədə çox net mesajlar çatdırıb.
Təhlükəsizlik qaynakları qeyd edib ki, İraq, BƏƏ, Səudiyyə Ərəbistanı və Livan kimi ölkələrdən fərqli olaraq, Türkiyəyə yönələn raketlərin sayı azdır və onların hərəkət trayektoriyası fərqli bir "patern" (nümunə) təşkil edir. Hücumlar nəticəsində hər hansı can və mal itkisi baş verməyib, bütün raketlər müdafiə sistemləri tərəfindən havada məhv edilib. Bununla belə, Türkiyənin bu ehtiyatlı mövqeyinin "sonsuz tolerantlıq" kimi başa düşülməməsi lazım olduğu bildirilib. Rəsmi dairələr Türkiyənin milli təhlükəsizliyini qorumaq üçün kifayət qədər çəkindirici gücə malik olduğunu və lazım gəldikdə özünün müəyyən etdiyi üsullarla sanksiya xarakterli cavab tədbirləri görməkdən çəkinməyəcəyini bəyan ediblər.
Ankara regional sabitliyin qorunması üçün diplomatiya kanallarını da aktiv şəkildə işlətməyə davam edir. Prezident Rəcəb Tayyib Ərdoğanın rəhbərliyi ilə həyata keçirilən intensiv lider diplomatiyası gərginliyin daha geniş coğrafiyaya yayılmasının qarşısını almaqda həlledici rol oynayır. Eyni zamanda, daxili auditoriyada və sosial mediada regional gərginliyin "məzhəbçilik tələsinə" çevrilməməsi üçün xəbərdarlıq edilib. Təhlükəsizlik mənbələri vurğulayıb ki, məzhəb əsaslı müzakirələr Türkiyənin daxili hüzuruna və regional nüfuzuna zərər verə bilər, ona görə də ictimaiyyətdə birləşdirici dildən istifadə edilməsi və dezinformasiyalara qarşı ayıq-sayıq olunması strateji əhəmiyyət kəsb edir.
