BAKI,VOA, Nailə Babazadə
Türkiyə Milli Müdafiə Nazirliyi (MSB), "Eurofighter Typhoon" layihəsi çərçivəsində təyyarələrin saxlanılması və istismarına dair texniki və logistik dəstək müqaviləsinin imzalanması barədə tərəflər arasında tam razılıq əldə olunduğunu açıqlayıb.
VOA xəbər verir ki, rəsmi səfərlə Londonda olan Milli müdafiə naziri Yaşar Gülər və İngiltərənin müdafiə naziri Con Hili (John Healey) arasında keçirilən görüşdə iki ölkə arasındakı müdafiə sahəsində əməkdaşlıq məsələləri müzakirə edilib. Görüşün əsas nəticəsi olaraq, döyüş təyyarələrinin gələcəkdə fasiləsiz istismarını təmin edəcək logistik dəstək müqaviləsi imzalanıb.
Nazirliyin açıqlamasında qeyd olunur ki, "Eurofighter Typhoon" layihəsi üzrə təyyarə, avadanlıq və sursat alımına dair əsas müqavilə artıq 2025-ci ilin oktyabr ayında imzalanmışdı. Bugünkü görüşdə isə həmin təyyarələrin texniki idarəolunması və operativ fəaliyyətinin qorunması üçün zəruri olan dəstək paketləri rəsmiləşdirilib.
Tərəflər bu addımın hər iki ölkənin müdafiə sənayesi əlaqələrini daha da gücləndirəcəyini və hərbi tərəfdaşlığın yeni mərhələyə qədəm qoyduğunu ifadə ediblər.
