BAKI,VOA, Fərid Mikayılov

Türkiyə Milli Kəşfiyyat Təşkilatının koordinasiyası ilə həyata keçirilən əməliyyat çərçivəsində kibercinayət şəbəkəsinə qarşı genişmiqyaslı tədbirlər görülüb.

VOA xəbər verir ki, Ankara mərkəzli olmaqla 9 şəhərdə keçirilən əməliyyat nəticəsində saxlanılan 12 şübhəlidən 11-i həbs edilib, 1 nəfər isə məhkəmə nəzarəti şərti ilə sərbəst buraxılıb.

Əməliyyat Türkiyə Milli Kəşfiyyat Təşkilatı, Kibertəhlükəsizlik İdarəsi, Jandarma Baş Komandanlığı və Maliyyə Cinayətləri Araşdırma Şurasının birgə fəaliyyəti nəticəsində həyata keçirilib. Saxlanılan şəxslər arasında şəbəkənin texniki infrastrukturunu quran və idarə edən əsas fiqurun da olduğu bildirilir.

İstintaq çərçivəsində aparılan texniki araşdırmalar zamanı şəbəkənin həm ölkə daxilində, həm də xaricdə yerləşən serverlər üzərindən fəaliyyət göstərdiyi müəyyən edilib. Hüquqa zidd şəkildə şəxsi məlumatların sorğulanmasına imkan verən təxminən 40 sistemin fəaliyyəti dayandırılıb.

Əldə olunan serverlər və məlumat bazaları üzərində aparılan ekspertiza nəticəsində çoxsaylı istifadəçi məlumatları, sistem mənbə kodları və giriş qeydləri (loglar) aşkar olunub. Hazırda bu məlumatlar üzərində geniş texniki analiz davam etdirilir.

İstintaq zamanı müəyyən edilib ki, şəbəkə rəhbəri kimi tanınan A.B qurduğu sistemi “bayilik modeli” ilə yayaraq üçüncü şəxslərə satıb. Bu sistem vasitəsilə şəxsi məlumatların sorğulanması imkanı təqdim olunub və xidmətlər müxtəlif şəxslərə, o cümlədən cinayətkar qruplara ödəniş müqabilində təklif edilib.

Araşdırmalar nəticəsində 30-dan çox “bayi” şəbəkəsinin formalaşdırıldığı, həmçinin sistemdən xarici və qeyri-qanuni qurumların da istifadə etdiyi müəyyən olunub. Şəbəkə rəhbərinin istintaqla əməkdaşlıq etməsi nəticəsində cinayət sxemi və texniki mexanizmlər tam şəkildə üzə çıxarılıb.

Maliyyə təhlilləri zamanı şübhəlilərin ümumi pul dövriyyəsinin təxminən 177 milyon lirə olduğu müəyyən edilib. Şəbəkə üzvlərinin maliyyə izlərini gizlətmək üçün oflayn kripto pul kisələrindən istifadə etdiyi bildirilib.

Hazırda istintaq davam edir və əldə olunan yeni sübutlar əsasında əlavə saxlanmaların mümkün olduğu istisna edilmir.