BAKI,VOA Orxan Qədirzadə
Belçikanın Kraliçası Mathilda Türkiyəyə rəsmi səfəri çərçivəsində Baykar şirkətinin Milli Texnologiya Mərkəzini ziyarət edib.
VOA xəbər verir ki, Belçika İqtisadi Missiyası çərçivəsində baş tutan səfərdə kraliça ilə birlikdə Belçikanın xarici işlər naziri Maksim Prevo, müdafiə naziri Teo Frankken, regional hökumət nümayəndələri, diplomatlar, akademiklər və media təmsilçiləri iştirak ediblər.
Nümayəndə heyəti İstanbulda yerləşən Özdemir Bayraktar Milli Texnologiya Mərkəzində Baykarın pilotsuz uçuş aparatlarının istehsalı və elmi-tədqiqat fəaliyyəti ilə tanış olub. Qonaqları Baykar İdarə Heyətinin sədri Selçuk Bayraktar və şirkətin baş direktoru Haluk Bayraktar müşayiət edib.
Səfər zamanı Baykarın hazırladığı milli pilotsuz uçuş aparatları, o cümlədən Bayraktar AKINCI zərbə pilotsuz uçuş aparatı nümayiş etdirilib. Kraliça Matilda və nümayəndə heyətinə şirkətin həyata keçirdiyi istehsal və texnologiya layihələri barədə geniş məlumat verilib.
Ziyarətin sonunda nümayəndə heyəti Bayraktar AKINCI qarşısında xatirə fotosu çəkdirib. Həmçinin Kraliça Matildaya Bayraktar KIZILELMA pilotsuz döyüş təyyarəsinin maketi hədiyyə olunub.
Selçuk Bayraktar çıxışında Baykarın dünyada pilotsuz uçuş aparatları bazarında aparıcı mövqeyə sahib olduğunu bildirib. O qeyd edib ki, şirkət ixrac bazarının təxminən 60 faizinə nəzarət edir və Avropa Türkiyə üçün əsas texnologiya və ticarət tərəfdaşlarından biridir.
Bayraktar beynəlxalq əməkdaşlığın və texnoloji tərəfdaşlığın qlobal təhlükəsizlik baxımından mühüm rol oynadığını vurğulayaraq, müdafiə sənayesində güclü ittifaqların formalaşdırılmasının vacibliyini qeyd edib.
