BAKI,VOA, Orxan Qədirzadə
Türkiyə tarixində ilk dəfə olaraq NATO və Avropa İttifaqına üzv ölkəyə hərbi gəmi ixrac edib. Bu barədə Türkiyə Prezidenti Rəcəb Tayyib Ərdoğan Rumıniya Hərbi Dəniz Qüvvələrinə təhvil verilən “CAm. Roman” açıq dəniz patrul gəmisinin təqdimat mərasimində çıxışı zamanı bildirib.
İstanbulda keçirilən tədbirdə həm Rumıniya Hərbi Dəniz Qüvvələri üçün inşa edilmiş patrul gəmisinin təhvil verilməsi, həm də Türkiyə Hərbi Dəniz Qüvvələrinin yeni platformalarının xidmətə qəbul və bayraq qaldırma mərasimləri təşkil olunub.
Prezident Ərdoğan çıxışında vurğulayıb ki, Rumıniya ilə imzalanmış satış müqaviləsi sayəsində Türkiyə tarixində ilk dəfə NATO və Avropa İttifaqı üzvü olan bir ölkəyə hərbi gəmi ixrac edib.
Dövlət başçısı qeyd edib ki, Türkiyənin dəniz müdafiə sənayesi son illərdə böyük inkişaf yolu keçib və ölkə dünyanın müxtəlif bölgələri üçün 140-dan çox hərbi və yardımçı dəniz platforması inşa edib.
Ərdoğan Türkiyə gəmiqayırma sənayesinin respublikanın 103 illik tarixində ən intensiv və məhsuldar dövrünü yaşadığını bildirib.
Onun sözlərinə görə, Türkiyə eyni vaxtda ən çox sayda hərbi gəmi inşa edə bilən ölkələr sırasında yer alır. Bu potensial ölkənin müdafiə sənayesində əldə etdiyi texnoloji və istehsal imkanlarının göstəricisi hesab olunur.
Prezident müdafiə sənayesi sahəsində beynəlxalq əməkdaşlığın əhəmiyyətinə də toxunub. O bildirib ki, Türkiyə dost və tərəfdaş ölkələrlə müdafiə sənayesində əldə etdiyi imkanları bölüşməyi özünün mühüm vəzifələrindən biri hesab edir.
Rəcəb Tayyib Ərdoğan vurğulayıb ki, Türkiyənin məqsədi regionda yeni gərginlik ocaqları yaratmaq deyil, əksinə, sülhün, ədalətin, sabitliyin və əmin-amanlığın möhkəmlənməsinə töhfə verməkdir.
Dövlət başçısı beynəlxalq vəziyyətin hazırda kifayət qədər mürəkkəb və dəyişkən olduğunu qeyd edərək bildirib ki, real gücə malik olmayan dövlətlər danışıqlar masasında öz mövqelərini qorumaqda çətinliklə üzləşə bilərlər.
Ərdoğanın sözlərinə görə, müasir beynəlxalq münasibətlər sistemində hərbi, texnoloji və sənaye potensialı ölkələrin qlobal və regional proseslərdə təsir imkanlarını müəyyən edən əsas amillərdən biri olaraq qalır.
Rumıniyaya hərbi gəmi ixracı Türkiyənin müdafiə sənayesinin beynəlxalq bazarlarda mövqeyinin gücləndiyini və ölkənin yüksək texnologiyalı hərbi məhsul istehsalçısı kimi nüfuzunun artdığını göstərən mühüm hadisə kimi qiymətləndirilir.
