BAKI,VOA,Yusif Şərifzadə

Türkiyə Prezidenti Rəcəb Tayyib Ərdoğan Rumıniya Prezidenti Nikuşor Dan ilə İstanbulda görüş keçirib.

VOA xəbər verir ki, bu barədə Türkiyə Prezident Administrasiyası məlumat yayıb.

Bildirilib ki, görüş İstanbul Gəmiqayırma Komandanlığında Rumıniya Hərbi Dəniz Qüvvələrinə "TCG Akhisar / OPV CAm. Roman" patrul gəmisinin təhvil verilməsi mərasimindən sonra baş tutub.

Görüş zamanı Türkiyə ilə Rumıniya arasında ikitərəfli münasibətlər, eləcə də regional və beynəlxalq məsələlər müzakirə olunub.

Məlumata görə, Rəcəb Tayyib Ərdoğan ticarət, müdafiə və təhlükəsizlik sahələri başda olmaqla müxtəlif istiqamətlərdə Rumıniya ilə əməkdaşlığın genişləndirilməsinə böyük önəm verdiklərini bildirib.

Türkiyə lideri iki ölkə arasındakı əlaqələrin daha da gücləndirilməsi üçün addımların davam etdiriləcəyini vurğulayıb.

Ərdoğan həmçinin Qara dənizlə bağlı məsələlərdə Ankara və Buxarest arasında sıx əməkdaşlığın vacibliyini qeyd edib.

Onun sözlərinə görə, Türkiyə Qara dənizdə təhlükəsizliyin qorunması və möhkəmləndirilməsi məqsədilə sahilyanı dövlətlərlə koordinasiyalı fəaliyyət göstərir.

Türkiyə Prezidenti əlavə edib ki, İranla bağlı sülh prosesində yaranmış müsbət dinamikanın Rusiya-Ukrayna müharibəsinin başa çatdırılması istiqamətində də faydalı nəticələr verməsi üçün Ankara fəal səylər göstərir.

Görüşdə Türkiyənin milli müdafiə naziri Yaşar Gülər, daxili işlər naziri Mustafa Çiftçi, Baş Qərargah rəisi Səlcuq Bayraktaroğlu, Prezident Administrasiyasının Kommunikasiya İdarəsinin rəhbəri Burhanəddin Duran və Prezidentin təhlükəsizlik və xarici siyasət üzrə baş müşaviri Akif Çağatay Kılıç da iştirak ediblər.