BAKI,VOA Orxan Qədirzadə
Türkiyə Prezidenti Rəcəb Tayyib Ərdoğan iyulun 7-8-də Ankarada keçiriləcək NATO Zirvəsi çərçivəsində ABŞ Prezidenti Donald Trampla ikitərəfli görüş keçirə biləcəyini açıqlayıb.
Prezident Ərdoğan hakim Ədalət və İnkişaf Partiyasının parlament qrupunun iclasından sonra jurnalistlərin suallarını cavablandırarkən NATO Zirvəsi çərçivəsində Trampla təkbətək görüşün mümkünlüyünə münasibət bildirib.
“Ankaradakı zirvədə Tramp ilə təkbətək görüşəcəksinizmi?” sualına cavab olaraq Türkiyə lideri “Böyük ehtimalla olacaq” deyə bildirib.
Ərdoğanın açıqlaması Ankara ilə Vaşinqton arasında son dövrlərdə regional təhlükəsizlik, müdafiə əməkdaşlığı, Yaxın Şərqdəki proseslər və NATO daxilində koordinasiya məsələlərinin aktuallığını qoruduğu bir vaxta təsadüf edir.
Prezident çıxışı zamanı “Terrorsuz Türkiyə” təşəbbüsü ilə bağlı da danışıb. O bildirib ki, bu istiqamətdə nəzərdə tutulan qanunvericilik dəyişikliklərinin mümkün qədər qısa müddətdə həyata keçirilməsi üçün işlər davam etdirilir.
“Hazırlaya bildiyimiz bütün hüquqi tənzimləmələri vaxtında həyata keçirəcəyik”, – deyə Ərdoğan vurğulayıb.
Bu arada ABŞ Prezidenti Donald Tramp da bir neçə gün əvvəl Türkiyəyə səfər edəcəyini açıqlamışdı. O, NATO Zirvəsində iştirak etmək niyyətində olduğunu bildirərək, yaxın dövrdə Türkiyəyə, daha sonra isə Çinə səfər etməyi planlaşdırdığını qeyd etmişdi.
Tramp açıqlamasında “Türkiyəyə gedəcəyəm, həmçinin bu il ərzində müəyyən vaxtda Çinə də səfər edəcəyəm” ifadələrini işlədib.
Beləliklə, NATO Zirvəsi çərçivəsində Ərdoğan və Tramp arasında keçirilə biləcək görüş beynəlxalq ictimaiyyətin diqqət mərkəzindədir. Analitiklərin fikrincə, tərəflər arasında mümkün danışıqlarda NATO-nun gələcək strategiyası, regional təhlükəsizlik məsələləri, Ukrayna müharibəsi, Yaxın Şərqdəki vəziyyət, müdafiə sənayesi əməkdaşlığı və ikitərəfli münasibətlərin gündəmdə olan digər mövzularının müzakirə olunacağı gözlənilir.
Ankarada keçiriləcək NATO Zirvəsi alyansın üzv dövlətləri arasında təhlükəsizlik sahəsində əməkdaşlığın gücləndirilməsi və qlobal çağırışlara qarşı birgə fəaliyyət mexanizmlərinin müzakirəsi baxımından son illərin ən mühüm beynəlxalq tədbirlərindən biri hesab olunur.
