BAKI,VOA Orxan Qədirzadə
Türkiyənin vitse-prezidenti Cövdət Yılmaz rəsmi səfərlə İrana yollanacaq. Səfər çərçivəsində o, Türkiyə adından İranın keçmiş ali dini lideri Ayətullah Əli Xameneinin dəfn mərasimində iştirak edəcək və bir sıra rəsmi görüşlər keçirəcək.
Məlumata görə, Cövdət Yılmaz səfər zamanı ilk olaraq İran Prezidenti Məsud Pezeşkian ilə görüşəcək.
Görüşdə Yılmaz fevralın 28-də ABŞ və İsrail tərəfindən həyata keçirildiyi bildirilən hücum nəticəsində həlak olan Ayətullah Əli Xamenei ilə bağlı Türkiyə rəhbərliyinin başsağlığını İran Prezidentinə çatdıracaq.
Danışıqlar zamanı Türkiyə ilə İran arasında ikitərəfli münasibətlərin hazırkı vəziyyəti və əməkdaşlığın gələcək perspektivlərinin də müzakirə olunacağı gözlənilir.
Daha sonra Türkiyənin vitse-prezidenti Prezident Rəcəb Tayyib Ərdoğanı və Türkiyəni təmsil edərək Tehrandakı İmam Xomeyni məscidində keçiriləcək dəfn mərasimində iştirak edəcək.
