BAKI,VOA Orxan Qədirzadə
Türkiyədə Ahbap Dərnəyi ilə bağlı aparılan istintaq çərçivəsində saxlanıldıqdan sonra həbs edilən Alper Çelikin prokurorluğa verdiyi ifadənin detalları məlum olub.
İstintaq materiallarına əsasən, Beşiktaş rayonunda notariat kontorunda əməliyyat apararkən saxlanılan Alper Çelik ifadəsində aktiv peşmanlıq (etkin peşmanlıq) müddəasından yararlanmaq istədiyini bildirib.
Çelik ifadəsində maliyyə vəsaitlərinin mənşəyini bilmədiyini deyərək, bütün əməliyyatları Haluk Leventin göstərişləri əsasında həyata keçirdiyini iddia edib.
Onun sözlərinə görə, Haluk Levent şəxsi bank hesablarından birbaşa istifadə etməsə də, həyata keçiriləcək əməliyyatları telefon vasitəsilə ona bildirirdi və o da verilən tapşırıqları yerinə yetirirdi.
Çelik bildirib ki, Levent bəzən ondan müəyyən məbləğdə vəsaiti hesabına köçürməsini istəyirdi, daha sonra isə həmin vəsaitlə mobil tətbiq vasitəsilə birja əməliyyatları aparırdı. O, bu prosesə müdaxilə etmədiyini vurğulayıb.
İfadəsində iddia edib ki, mərc platformalarında əməliyyat aparılması üçün bank hesabının istifadəçinin adına olması tələb olunduğundan onun adına mərc hesabı açılıb.
Çelikin sözlərinə görə, Haluk Levent ona hansı idman oyunlarına mərc edilməli olduğunu bildirirdi və o da həmin göstərişlərə uyğun kuponlar hazırlayırdı. Bəzi hallarda Levent özü də həmin hesaba daxil olaraq mərc etsə də, əksər hallarda bu işi Çelik vasitəsilə həyata keçirirdi.
O, nəticədə göstərilən məbləğlər həcmində maliyyə itkilərinin yarandığını bildirib.
Alper Çelik ifadəsində Kapalıçarşıdakı valyutadəyişmə məntəqələrinə də göndərildiyini iddia edib.
Onun sözlərinə görə, Haluk Levent vaxtaşırı onu Kapalıçarşıdakı valyutadəyişmə məntəqəsinə göndərərək xarici valyuta və türk lirəsi aldırır, daha sonra həmin vəsaitlər müxtəlif bank hesablarına yatırılaraq birja və mərc əməliyyatlarında istifadə olunurdu.
Çelik bu vəsaitlərin haradan əldə edildiyini bilmədiyini vurğulayıb.
O əlavə edib ki, Haluk Levent bəzən ona müxtəlif şəxslərin adlarını verir, o isə həmin şəxslərdən aldığı pulları göstərilən bank hesablarına yatırır və ya nağd şəkildə Haluk Leventə təhvil verirdi.
İfadəsinin sonunda Alper Çelik istintaqla əməkdaşlıq etməyə hazır olduğunu bildirib.
"Ağlıma gələn başqa məqamlar olarsa, məmnuniyyətlə kömək edərəm. Mən də maddi və mənəvi zərər çəkmişəm. Özümü zərərçəkmiş və təqsirsiz hesab edirəm", – deyə o ifadəsində qeyd edib.
