BAKI, AzerVoice

ABŞ ordusu Yəmənin paytaxtı Sənaya hava zərbələri endirib.

AzerVoice xəbər verir ki, bu barədə Yəmənin "Ənsar Allah" (Husilər) hərəkatının nəzarətində olan "Al Masirah" telekanalı məlumat yayıb.

Məlumata əsasən, hava zərbələri nəticəsində azı 8 nəfər həlak olub.

Zərbələr nəticəsində üç yaşayış binası dağılıb. Ölənlər arasında qadınlar və uşaqlar da var. Yaralananlar barədə də məlumat verilib, lakin onların sayı dəqiqləşdirilməyib.

Xatırladaq ki, Qəzza zolağındakı münaqişənin 2023-cü ildə gərginləşməsindən sonra husilər İsrail ərazisinə raket hücumları edəcəklərini və onunla əlaqəli gəmilərin Qırmızı dəniz və Bab əl-Məndəb boğazından keçməsinə imkan verməyəcəklərini bəyan etmişdilər. Qəzzada yanvar ayının ortalarında atəşkəs rejiminin tətbiqindən sonra bu hücumlar dayandırılmışdı. Lakin martın əvvəlində atəşkəsin pozulmasından sonra husilər İsrailə məxsus gəmilərə qarşı Qırmızı dənizdə yenidən hücumlara başladılar və daha sonra raketlər vasitəsilə İsrail ərazisindəki obyektlərə hücumlarını bərpa etdilər.

Martın 15-də ABŞ prezidenti Donald Trampın əmri ilə husilərin nəzarətində olan Yəmən ərazilərindəki obyektlərə kütləvi hava zərbələri endirilməyə başlanılıb. ABŞ Silahlı Qüvvələrinin Mərkəzi Komandanlığı (CENTCOM) bəyan edib ki, bu əməliyyat Amerikanın maraqlarını qorumaq və təhlükəsiz gəmiçiliyi təmin etmək məqsədi daşıyır.