BAKI, AzerVoice Analitik Təhlil Mərkəzi
Səudiyyə Ərəbistanının vəliəhdi və Baş naziri şahzadə Məhəmməd bin Salman cümə axşamı NEOM sarayında Misir prezidenti Əbdülfəttah əs-Sisini qəbul edib. Görüşdə iki ölkə arasındakı “qardaşlıq münasibətləri” və onların müxtəlif sahələrdə gücləndirilməsi yolları müzakirə olunub.
Fələstin məsələsi və Qəzza böhranı
Tərəflər regional prosesləri, xüsusilə Fələstindəki vəziyyəti diqqət mərkəzinə alıblar. Prezident Sisi Misirin Qəzzada atəşkəsin təmin olunması istiqamətində göstərdiyi vasitəçilik səyləri barədə məlumat verib. O, həmçinin Fələstin məsələsində Səudiyyə təşəbbüslərinə, o cümlədən BMT-də Riyad və Parisin birgə rəhbərliyi ilə keçirilən “iki dövlətli həll” konfransının nəticələrinə dəstək verdiyini vurğulayıb.
Şahzadə Məhəmməd bin Salman və prezident Sisi Qəzzaya humanitar yardımın maneəsiz daxil olmasının, girovların və məhbusların azad edilməsinin vacibliyini önə çəkiblər. Onlar, həmçinin fələstinlilərin torpaqlarından zorla köçürülməsinə, Qəzzada İsrail hərbi işğalının yenidən tətbiqinə və İordan çayının qərb sahilindəki zorakılıqlara qarşı çıxdıqlarını bəyan ediblər.
Rəsmi nümayəndə heyətləri
Görüşdə Səudiyyə tərəfdən xarici işlər naziri şahzadə Feysəl bin Fərhan, dövlət naziri və milli təhlükəsizlik müşaviri Müsəid əl-Əyban və Baş Kəşfiyyat İdarəsinin rəhbəri Xalid əl-Hüməydan iştirak ediblər. Misir tərəfindən isə xarici işlər və miqrasiya naziri Bədr Əbdülati və Baş Kəşfiyyat İdarəsinin rəhbəri general Həsən Rəşad görüşdə yer alıblar.
Strateji koordinasiya
Rəsmi Qahirənin məlumatına görə, tərəflər ikitərəfli əməkdaşlıqla yanaşı, Yaxın Şərqdə sürətlə dəyişən geosiyasi proseslər fonunda strateji məsləhətləşmələri davam etdirmək barədə razılığa gəliblər. İki lider, həmçinin, region ölkələrinin sabitliyinin dəstəklənməsi, ərazi bütövlüyünün qorunması və milli institutların gücləndirilməsinin zəruriliyini vurğulayıblar.
Prezident Sisi həmin gün NEOM-a xüsusi səfər edib və hava limanında şəxsən şahzadə Məhəmməd bin Salman tərəfindən qarşılanıb. Misir Prezident Administrasiyası səfəri “iki ölkə arasında tarixi münasibətlərin möhkəmləndirilməsi və daimi siyasi məsləhətləşmələrin davamı” kimi dəyərləndirib.
