BAKI,AzerVoice, Fərid Mikayılov
Barselonanın braziliyalı hücumçusu Rafinya, 2024-cü ilin yayında Səudiyyə Ərəbistanından aldığı yüksək məbləğli transfer təklifini qəbul etməyə çox yaxın olduğunu, lakin komandanın yeni baş məşqçisi Hansi Flikin zəngi sayəsində Barselonada qalmağa qərar verdiyini açıqlayıb.
AzerVoice xəbər verir ki, 28 yaşlı futbolçu bildirib ki, 2024-cü ilin yayında aldığı Səudiyyə Ərəbistanı təklifi maddi baxımdan onun və ailəsinin həyatını tam dəyişdirəcək qədər böyük idi.
“Futbola 15 yaşımda başlamışam. Həm yaxşı, həm də çox çətin dövrlərim olub. Elə bir məqam yetişmişdi ki, düşündüm artıq özüm və ailəm barədə düşünməliyəm. Səudiyyə Ərəbistanından gələn təklif çox cazibəli idi. O, təkcə mənim deyil, valideynlərimin və oğlumun da həyatını dəyişdirə bilərdi. Biz getməyi ciddi şəkildə düşündük. Lakin Hansi Fliklə söhbətim hər şeyi dəyişdirdi”- deyə o bildirib.
Rafinya qeyd edib ki, Kopa Amerikadan sonra Barselonadan ayrılmaq qərarına yaxın olub, lakin Fliklə telefon danışığı və daha sonra keçirilən görüş onun düşüncəsini dəyişib.
2024-cü ilin aprelində yayılan xəbərlərə görə, Əl-Hilal braziliyalı ulduzu transfer etmək üçün 100 milyon avro təklif etmiş, həmçinin ona 4 illik, ümumilikdə 170 milyon avroluq müqavilə təklif etməyə hazır idi.
O dövrdə həm maliyyə, həm də idman baxımından çətinlik çəkən Barselona rəhbərliyi Rafinyanı satmağı planlaşdırırdı. Lakin Flikin etimadı və psixoloji dəstəyi futbolçunun qərarını dəyişdirdi.
Flikin rəhbərliyi altında Rafinya 2024–2025 mövsümündə karyerasının ən uğurlu dövrünü yaşadı.
O, bütün turnirlərdə 57 oyuna 34 qol və 26 assist qeydə aldı.
Rafinya 2025-ci ildə Barselona ilə 2028-ci ilə qədər yeni müqavilə imzalayıb. Cari mövsümdə o, artıq 6 oyunda 3 qol vurub və 2 məhsuldar ötürmə edib.
