BAKI, AzerVoice
Erkən Osmanlı tarixinin xronologiyası olduqca mürəkkəbdir. Lakin Osmanlı tarixşünaslığının ən görkəmli simalarından biri sayılan Halil İnalcığın araşdırmaları Osman Qazinin hərbi fəaliyyətini daha aydın şəkildə ortaya qoyur. Bafey və Dimbos qələbələrindən sonra Osman Qazi 1304-cü ildə Sakarya çayı üzərində yerləşən Bizans qalalarına qarşı hərbi yürüş təşkil etdi. Bu səfərdən öncə Karacahisara dəvət olunan Harmankaya təkvuru Köse Mihal İslama çağırıldı.
Yürüş zamanı Leblebici Hisarı, Çadırlı, Lefke (indiki Osmaneli) və Mekece təkvurları müqavimət göstərə bilməyəcəklərini anlayaraq itaət etdilər. Geyve təkvuru isə qalasını boşaldaraq qaçdı və Geyvedən sonra “Təkvur bulağı” adlanan ərazi fəth edildi.
Osman Qazinin 1304-cü il yürüşü davam edərkən Çovdar tatarları, yəni monqollar Qaracahisarı qarət etdilər. Bunun ardınca Osman Qazi Karacahisarda qalaraq oğlu Orxan bəyi Köse Mihal, Akçakoca, Konur Alp və Qazi Rəhmanla birlikdə 1305-ci ildə Qara Çepuş və Qara Tigin qalalarının fəthi üçün göndərdi.
Bu hadisədən xəbər tutan Bizans imperatoru da bölgəyə yardım qüvvələri yolladı. Orxan Qazi Qara Çepuş qalasına çatdıqda ordusunu üç hissəyə böldü: bir dəstə ilə qalanı mühasirəyə aldı, bir hissəni qala yaxınlığındakı qayalıqda gizlətdi, digər hissəni isə qalanın arxa tərəfinə keçirdi.
Tətbiq edilən hərbi taktika nəticəsində Osmanlı qüvvələri qalaya hücum edib geri çəkilmə manevri etdilər. Bunun ardınca qaladan çıxan təkvur qüvvələri pusquya düşərək məğlub edildi və qala fəth olundu.
Qara Çepuş qalasının alınmasından sonra Orxan Qazinin qüvvələri Absu ərazisini fəth edərək Qara Tigin qalasına yönəldilər. Qara Tigin təkvurunun təslim olmaqdan imtina etməsi nəticəsində qala mühasirəyə alındı və döyüş yolu ilə ələ keçirildi.
Fəth edilən qalalar isə Osmanlı sərkərdələrinin idarəsinə verildi.
