BAKI, AzerVoice
Dünyada sürətlə yayılan arıqlama üsulu, sağlamlıq risklərini artırır.
AzerVoice xəbər verir ki, son
dövrlərdə sürətlə populyarlaşan arıqlama inyeksiyaları nəzarətsiz
istifadə nəticəsində ciddi sağlamlıq problemlərinə yol açır.
Xüsusilə sosial media platformalarında və məşhurlar arasında geniş
yayılan bu üsul, ilkin mərhələdə sürətli çəki itkisi və arıqlama
vədi versə də, bir çox təhlükəli yan təsirləri də özü ilə
gətirir.
Mütəxəssislər arıqlama iynələrinin təkcə sifət, əl və ayaqlarda əzələ itkilərinə deyil, həm də ümumi sağlamlıqda ciddi pozuntulara səbəb olduğunu bildirirlər. Üzün sallanması ("Ozampik üzü" adlandırılır), ürək ritm pozğunluqları, həzm sistemi problemləri, mədə və bağırsaq ağrıları, əzələ atrofiyası və qan şəkəri balansının pozulması bu inyeksiyaların əsas təhlükəli təsirləri sırasındadır.
Endokrinologiya və Metabolik Xəstəliklər Mütəxəssisi Prof. Dr. Ela Keskin bildirib ki, bu dərmanlar qəfil əzələ parçalanmasına, hipoglisemiyaya (qanda şəkərin təhlükəli dərəcədə aşağı düşməsi) və həzm sistemində ciddi problemlərə yol aça bilər. Onun sözlərinə görə, bu inyeksiyalar yalnız bədən kütlə indeksi (BKİ) 30-dan yüksək olan obez xəstələrdə və ya əlavə xəstəliklərlə birgə BKİ-si 35-dən yüksək olan şəxslərdə ciddi tibbi nəzarət altında istifadə edilməlidir.
Əslində diabet və piylənmənin müalicəsi üçün hazırlanan bu dərmanların geniş ictimaiyyət üçün asan əldəolunan hala gəlməsi böyük narahatlıq doğurur.
Kardiologiya Mütəxəssisi Prof. Dr. Fatih Mehmet Uçar da arıqlama inyeksiyalarının ürək-damar sisteminə təsirlərinə diqqət çəkərək xəbərdarlıq edib. O bildirib ki, bu dərmanlar qan təzyiqini aşağı sala, ürək ritmini sürətləndirə və aritmiyaları pisləşdirə bilər. Prof. Uçar dərmanların təsirləri barədə kifayət qədər məlumatın olmadığını və bu vəziyyətin pasiyentlər üçün əlavə risklər yaratdığını vurğulayıb.
Mütəxəssislər arıqlama inyeksiyalarının yalnız həkim resepti əsasında və tibbi nəzarət altında satılmalı olduğunu bildirirlər. Onların fikrincə, bu dərmanların nəzarətsiz və çəkiyə uyğun olmayan dozalarda istifadəsi, təkcə estetik fəsadlara deyil, uzunmüddətli sağlamlıq problemlərinə də yol aça bilər.
Qeyd edək ki, dünya səhiyyə qurumları da arıqlama dərmanlarının reseptsiz satışına qarşı daha sərt qaydaların tətbiqini müzakirə edirlər. Belə tədbirlər həm əhalinin sağlamlığını qorumaq, həm də yanlış istifadə nəticəsində yaranan ağırlaşmaların qarşısını almaq məqsədi daşıyır.
