BAKI,AzerVoice, Fərid Mikayılov
Yüksək qan təzyiqinə qarşı intensiv mübarizə, ürək-damar xəstəliklərinin qarşısının alınmasında mühüm rol oynaya biləcəyini göstərib.
Çinli mütəxəssislərin rəhbərlik etdiyi tədqiqat qrupu Çin, Kanada və ABŞ-da aparılmış altı klinik araşdırmanın nəticələrini birləşdirib. Təxminən 80 min nəfərin məlumatları üzərində aparılan analiz bu sahədə indiyədək edilən ən əhatəli iş hesab olunur.
Nəticələrə görə, dərman müalicəsi ilə yanaşı kilo vermək, siqareti tərgitmək və sağlam qidalanmaq kimi həyat tərzi dəyişikliklərini həyata keçirən, sistolik qan təzyiqini 120–130 mm civarına qədər endirən şəxslərdə infarkt, insult və ürək-damar mənşəli ölüm halları standart müalicə alanlara nisbətən əhəmiyyətli dərəcədə az qeydə alınıb.
Eyni zamanda, intensiv nəzarət tətbiq edilən xəstələrdə başgicəllənmə, huşunu itirmə, böyrək funksiyası problemləri və ürək ritmində pozulmalar kimi yan təsirlərin daha çox müşahidə olunduğu vurğulanıb.
Bu səbəbdən mütəxəssislər arasında fikir ayrılığı qalır: bəzi həkimlər qan təzyiqinin həddindən artıq aşağı salınmasının, xüsusən yaşlı xəstələrdə yıxılma riskini artıra biləcəyini bildirirlər.
Araşdırmanın müəllifləri nəticələrin qan təzyiqinə intensiv nəzarətin “aydın faydasını” sübut etdiyini qeyd ediblər. Onlar həkimlərə hər bir xəstənin vəziyyətini nəzərə alaraq fərdi müalicə strategiyalarından istifadə etməyi tövsiyə ediblər. Bu yanaşma həm həddindən artıq, həm də yetersiz müalicədən qaçmağa imkan verə bilər.
