BAKI,AzerVoice
Cinin varlığı Qurani-Kərim və Sünnə ilə sabitdir. Quranda cinlərlə bağlı ayrıca bir surə nazil olmuşdur. Səhih hədislər və təvatür dərəcəsində möhkəm xəbərlər də cinlərin varlığını təsdiqləyir. Cinin varlığını inkar edən, məlum ayələri inkar etmiş sayılacağı üçün İslam ümmətindən çıxmış olar. Allah bizi belə aqibətdən qorusun.
Lakin “cinlər görünür, yoxsa görünmür?” – bu məsələni düzgün başa düşmək lazımdır. İmam Şafii (r.a.) buyurur: “Kim ‘mən cin gördüm’ deyərsə, onun şahidliyi qəbul olunmaz.”
Çünki bu ifadə Allah-Təalanın Əraf surəsindəki bu kəlamına ziddir: “Həqiqətən, o (şeytan) və onun tayfası sizi, sizin onları görə bilmədiyiniz yerlərdən görürlər.”
(Əraf, 27)
Bu ayə göstərir ki, cinlərin əsl mahiyyəti görünməzdir. Onlar yalnız təcəssüm edib maddi şəkil aldıqda görünə bilərlər. Ən çox qara it, pişik, inək, qoyun, dəvə, ilan, əqrəb və ya insan surətində təzahür edirlər.
Müxtəlif məqamlarda cinlərə ammar, ərvah, şeytan, ifrit kimi adlar da verilir. Cinin insan surətində görünməsi həm ayə, həm də hədislə sabitdir. Məsələn, Bədr döyüşü zamanı şeytan Suraqə ibn Malik surətində Qureyşlilərə gəlmiş və “mən sizin dostunuzam” demişdi. Yenə, Peyğəmbəri (s.ə.s.) öldürmək üçün toplananların yanına şeytan Nəcdli qoca qiyafəsində gəlmişdi.
Hədislərdən dəlillər
Əbu Hüreyrə (r.a.) rəvayət edir ki, Peyğəmbərimiz (s.ə.s.) buyurdu: “Dünən namazımı pozdurmaq üçün mənə bir ifrit hücum etdi. Allahın izni ilə onu tutdum və məscidin sütunlarından birinə bağlamaq istədim ki, hamınız səhər onu görün. Lakin Süleyman (ə.s.)-ın, ‘Ya Rəbbim, məndən sonra heç kəsə verilməyəcək bir mülk bəxş et’ duası yadıma düşdü. Allah o ifriti məndən rüsvay halda uzaqlaşdırdı.”
(Səhihi Buxari)
Başqa bir hədisdə Rəsulullah (s.ə.s.) buyurur: “Bir gün namaz qılırkən şeytan mənə hücum etdi. Onu tutub boğazından sıxdım və ağzından gələn yaşlığı hiss etdim.”
Bu hədislər göstərir ki, cin görünəndə maddi cisim halına keçmiş olur. Bu, cinlərin bəzən cisim halına girməsinə açıq dəlildir.
Rəvayətlərdə cinlərin üç sinfə bölündüyü bildirilir:
Qanadlı olanlar - quş kimi havada uçurlar
İlan, əqrəb və digər yer heyvanları surətində olanlar
Hesab və cəza ilə mükəlləf olan başqa bir sinif
İbn Abbas (r.a.) buyurur: “İlanları Allah o şəkildə yaratdı, onların əsli cindir. Necə ki, Bəni-İsraildə bəzi insanlar meymun və donuz şəklinə çevrildilər.”
Peyğəmbərimiz (s.ə.s.) bəzi səhabələrinə belə buyurmuşdur: “Mədinədə bir qrup cin müsəlman oldu. Evdə görünən birinə rast gəlsəniz, üç dəfə xəbərdarlıq edin. Əgər çəkilib getməzsə, o zaman öldürün. Çünki xəbərdarlıqdan sonra görünən ya şeytandır, ya da kafir cindir.”(Buxari)
