BAKI, AzerVoice Analitik Təhlil Mərkəzi
ABŞ Prezidenti Donald Tramp Ərəbistanının paytaxtı Ər-Riyadda Suriya Prezidenti Əhməd əl-Şəraa ilə görüşüb. Bu görüş, Trampın Suriyaya qarşı sanksiyaları ləğv edəcəyini açıqlamasının ertəsi baş tutub.
Ağ Ev rəsmisinin verdiyi məlumata görə, görüş Trampın bölgəyə səfəri çərçivəsində Səudiyyə Ərəbistanında keçiriləcək Körfəz liderlərinin geniş toplantısından əvvəl baş tutub.
Tramp bir gün öncə, Səudiyyə vəliəhd şahzadəsi və Baş nazir Məhəmməd bin Salmanın xahişi ilə Suriyaya qarşı sanksiyaların aradan qaldırılacağını bəyan edib. Eyni zamanda ABŞ Dövlət katibi Marko Rubio ilə Suriya xarici işlər naziri arasında Türkiyədə görüş planlaşdırıldığı bildirilib.
Ər-Riyadda keçirilən “Səudiyyə-ABŞ İnvestisiya Forumu” çərçivəsində çıxış edən Tramp bildirib ki, o, Suriya ilə münasibətlərin normallaşdırılması üçün ilk addımı atır və sanksiyaların qaldırılması ilə Suriya xalqına “möhtəşəm fürsət” vermək niyyətindədir. Tramp həmçinin qeyd edib ki, Türkiyə Prezidenti də bu qərarı dəstəkləyib.
O, sanksiyaları “o dövrdə vacib, amma qəddar bir alət” kimi xarakterizə edərək bildirib ki, artıq Suriya üçün qalxma və öz xalqının maraqlarını qoruma vaxtıdır. Tramp ölkəsinin hər kəslə sülh istəyində olduğunu vurğulayıb.
Dəməşqdən müsbət cavab
Trampın bu bəyanatından dərhal sonra Suriya rəsmiləri müsbət reaksiya veriblər. Suriya Xarici İşlər naziri Əsəd əl-Şeybani "X" sosial platformasında yayımlanan açıqlamasında Səudiyyə Ərəbistanı rəhbərliyinə və xalqına bu istiqamətdə göstərdikləri səylərə görə təşəkkür edib. O, bu addımı “haqqın zəfəri və ərəb birliyinin təsdiqi” kimi qiymətləndirib.
Əl-Şeybani əlavə edib ki, Səudiyyə diplomatiyası bir daha “ərəb dünyasında ağılı və hikməti təmsil etdiyini” sübut edib. Nazir hesab edir ki, bu təşəbbüs Suriyanın birliyinə, sabitliyinə və regionda yenidən fəal rol almasına töhfə verəcək.
O, bu addımı Suriyada yenidənqurma prosesinə başlanğıc kimi qiymətləndirib və bildirib ki, “Səudiyyə də daxil olmaqla ərəb qardaşlarımızın mövqeyi sayəsində, Suriya xalqının layiq olduğu gələcəyə doğru yeni bir səhifə açılır.”
Əl-Şeybani “SANA” agentliyinə verdiyi açıqlamada bildirib ki, bu sanksiyalar vaxtilə “Əsəd rejiminin müharibə cinayətlərinə cavab olaraq” tətbiq olunmuşdu. Lakin indiki qərar, “illərlə davam edən dağıdıcı müharibədən sonra sabitlik və yenidənqurma yolunda dönüş nöqtəsidir.”
Nazir bildirib ki, Dəməşq bu qərarı yüksək qiymətləndirir və ABŞ ilə qarşılıqlı hörmətə, etimada və ortaq maraqlara əsaslanan münasibətlər qurmağa hazırdır. Onun sözlərinə görə, Prezident Tramp “Amerika maraqları naminə Suriyada tarixi bir sülh razılaşması və real qələbə əldə edə bilər.”
