BAKI,AzerVoice, Orxan Qədirzadə
Türkiyənin Xarici İşlər Nazirliyi İsrailin İordan çayının qərb sahilini ilhaqı qərarına sərt reaksiya verib.
AzerVoice xəbər verir ki, Türkiyənin Xarici İşlər Nazirliyi İsrail parlamentinin (Knesset) işğal altındakı İordan çayının qərb sahilinin ilhaqını nəzərdə tutan qanun layihəsini təsdiqləməsinə kəskin etiraz bildirib.
Nazirliyin yazılı açıqlamasında qeyd olunub ki, İsrailin bu addımı beynəlxalq hüquqa ziddir və “yox hükmündə” sayılır.
“Qəzzada sülh səylərinin davam etdiyi bir vaxtda atılan bu təxribat xarakterli addım bölgədəki təhlükəsizlik və sabitliyi ciddi şəkildə təhdid edir”, – açıqlamada vurğulanıb.
Türkiyə XİN bəyan edib ki, 1967-ci ildən bəri İsrailin işğalı altında olan, o cümlədən Şərqi Qüdsü də əhatə edən İordan çayının qərb sahili Fələstin torpağıdır və oradakı qanunsuz faktiki ilhaqlara icazə verilməməlidir.
Bildirilib ki, Ankara Fələstin xalqının ayrılmaz hüquqlarını müdafiə etməyə və 1967 sərhədləri daxilində, paytaxtı Şərqi Qüds olan müstəqil Fələstin dövlətinin yaradılması istiqamətində səylərini davam etdirəcək.
Xatırladaq ki, İsrail parlamenti - Knesset, çərşənbə günü keçirilən iclasda Qərb Sahilinə İsrail suverenliyinin tətbiqini nəzərdə tutan qanun layihəsini birinci oxunuşda təsdiqləyib.
Knesset eyni zamanda Şərqi Qüds yaxınlığındakı “Maale Adumim” yaşayış məntəqəsinin İsrail ərazisinə ilhaqını nəzərdə tutan qanun layihəsini də ilkin oxunuşda qəbul edib.
Lakin hər iki qanun layihəsi qanuni qüvvəyə minməsi üçün daha üç səsvermədən keçməlidir.
İsrailin dövlət yayım şirkətinin məlumatına görə, “Noam” adlı ifrat sağçı partiyanın lideri Avi Maoz bu qanun layihəsini Knessetə təqdim edib, baxmayaraq ki, baş nazir Benyamin Netanyahu hazırkı dövrdə səsvermənin keçirilməsinə qarşı çıxıb.
Xatırladaq ki, iyulun 23-də Knesset Qərb Sahilinin ilhaqını dəstəkləyən bənzər təklifə səs verib, o zaman 120 deputatdan 71-i layihənin lehinə çıxış etmişdi. Bu addım beynəlxalq aləmdə kəskin reaksiyalara səbəb olmuş, “iki dövlətli həll” perspektivini məhv edən addım kimi qiymətləndirilmişdi.
Yeni səsvermə ABŞ-ın vitse-prezidenti Cey Di Vansın İsraildə səfərdə olduğu vaxta təsadüf edib. Vans çərşənbə axşamı Qəzza sektorunda atəşkəs razılaşmasını möhkəmləndirmək məqsədilə İsrailə gəlib.
Qeyd edək ki, sentyabrın 26-da ABŞ prezidenti Donald Tramp bəyan etmişdi ki, İsrailin Qərb Sahilini ilhaq etməsinə icazə verməyəcək.
Hazırda ifrat sağçı İsrail partiyaları Qərb Sahilindəki yaşayış məntəqələrinə İsrailin inzibati və hüquqi nəzarətini tətbiq etmək məqsədilə fəal təzyiqlər göstərir.
