BAKI, AzerVoice, Orxan Qədirzadə
Türkiyə və İngiltərə arasında “Eurofighter Typhoon” döyüş təyyarələrinin tədarükünə dair razılaşma əldə edilib
AzerVoice xəbər verir ki, Türkiyə prezidenti Rəcəb Tayyib Ərdoğanla Türkiyədə səfərdə olan Böyük Britaniyanın Baş naziri Keir Starmer Ankarada birgə mətbuat konfransı keçiriblər. Görüş çərçivəsində iki ölkə arasında müdafiə sənayesi və iqtisadi əməkdaşlıq sahəsində mühüm razılaşmalar imzalanıb.
Prezident Ərdoğan, “Eurofighter Typhoon” döyüş təyyarələrinin tədarükünə dair tətbiq mexanizmlərinin heyətlərarası görüşlərdə imzalandığını açıqlayıb.
“Bu əməkdaşlığın müdafiə sənayesində yeni ortaq layihələrə yol açacağına inanırıq. Bu razılaşmanı iki yaxın müttəfiq arasında strateji münasibətlərin yeni bir simvolu hesab edirik,” – deyə dövlət başçısı qeyd edib.
“Ticarət həcmini ilk mərhələdə 30 milyard, daha sonra isə 40 milyard dollara çatdırmaqda qərarlıyıq. İqtisadi əlaqələri daha da gücləndirməyə sadiqik,” – deyə Ərdoğan bildirib.
Ərdoğan, Qəzzada atəşkəsin qorunması və pozuntuların qarşısının alınması üçün bütün ölkələrin məsuliyyət daşıdığını vurğulayıb.
“ Böyük Britaniyanın Fələstin Dövlətini tanıma qərarını alqışlayırıq. Bu addımı iki dövlətli həll yolunda cəsur bir addım kimi qiymətləndiririk,” – deyə o bildirib.
Baş nazir Keir Starmer öz çıxışında Türkiyə ilə strateji əməkdaşlığın yeni mərhələyə keçdiyini qeyd edib:
“Böyük Britaniya, Türkiyə ilə ilk ikitərəfli əməkdaşlıq çərçivəsini elan edir. Bu tərəfdaşlıq NATO daxilində təhlükəsizliyi daha da möhkəmləndirəcək və müdafiə sənayesində əməkdaşlığı artıracaq.”
Starmer, həmçinin, Türkiyəyə 20 ədəd Eurofighter Typhoon təyyarəsinin veriləcəyini, gələcəkdə bu sayın artırılmasının da planlaşdırıldığını bəyan edib.
Milli Müdafiə naziri Yaşar Gülər bildirib ki, Türkiyə ümumilikdə 44 “Eurofighter Typhoon” təyyarəsi əldə edəcək – bunlardan 12-si Qətərdən, 12-si Oman, 20-si isə Böyük Britaniyadan təmin olunacaq.
Bu razılaşma Türkiyənin hava qüvvələrinin modernləşdirilməsi və NATO müttəfiqləri ilə strateji müdafiə əlaqələrinin dərinləşdirilməsi istiqamətində mühüm addım kimi qiymətləndirilir.
