Bakı. AzerVoice
Birləşmiş Millətlər Təşkilatının Ümumdünya Ərzaq Proqramı (ÜƏP) Qəzza zolağına təcili və genişmiqyaslı ərzaq yardımına çağırış edib.
AzerVoice xəbər verir ki, bu barədə ÜƏP-in sosial media platforması X hesabında paylaşdığı yazılı və video müraciətdə məlumat yayıb.
Müraciətdə İsrailin hücumları və blokadası nəticəsində humanitar böhran yaşayan Qəzza zolağında aclığın sürətlə yayıldığını bildirərək,bölgənin bütün əhalisinə ərzaq çatdırmaq üçün yardımın miqyası dərhal artırılmalı olduğunu qeyd edib.
"Ərzaq yardımı yalnız atəşkəsin təmin olunması və yardım karvanlarının sərhədi tez və maneəsiz keçməsi ilə mümkün ola bilər", – deyə bildirilib.
Təşkilat bildirib ki, üç ay ərzində Qəzzada bütün əhalinin ehtiyaclarını qarşılayacaq qədər qida ehtiyatı mövcuddur. Lakin bu ehtiyatların bölgəyə çatdırılması üçün təhlükəsiz və davamlı giriş yollarına ehtiyac var.
Qeyd edək ki, hazırda Qəzza zolağı su, dərman, tibbi avadanlıq və gigiyena məhsullarının ciddi çatışmazlığı ilə üz-üzədir. Beynəlxalq və yerli mənbələrə görə, aclıqdan ölənlərin sayı artmaqdadır. 2023-cü il oktyabrın 7-dən bu yana Qəzzada aclıqdan azı 147 nəfər həyatını itirib, onların arasında uşaqların sayı xüsusilə diqqət çəkir.
