BAKI, AzerVoice, Nailə Babazadə
Ərəb ölkələri İsrail Baş naziri Benyamin Netanyahunun “Böyük İsrail” vizyonu ilə bağlı verdiyi açıqlamalara sərt reaksiya göstərib.
AzerVoice xəbər verir ki, Səudiyyə Ərəbistanı Xarici İşlər Nazirliyinin açıqlamasında İsrail Baş naziri tərəfindən səsləndirilən sözde “Böyük İsrail” vizyonuna dair fikirlər və israilli rəsmilər tərəfindən müdafiə olunan işğalçı və ekspansionist ideyalar və layihələr qəti şəkildə pislənilib.
Açıqlamada fələstinlilərin öz torpaqlarında müstəqil və suveren dövlət qurmaq hüququ bir daha vurğulanıb və beynəlxalq ictimaiyyət “İsrailin beynəlxalq legitimliyin əsaslarını sarsıdan, dövlətlərin suverenliyini açıq şəkildə pozan, regional və beynəlxalq təhlükəsizlik və sülhə təhdid yaradan hərəkətləri” mövzusunda xəbərdar edilib.
Qətər Xarici İşlər Nazirliyi də Netanyahunun sözde “Böyük İsrail” vizyonuna dair açıqlamalarını qınayıb.
Nazirliyin bəyanatında bu cür fikirlərin İsrailin təkəbbürünü, böhran və qarşıdurmaları alovlandırmaq, dövlətlərin suverenliyinə, beynəlxalq hüquqa, BMT Nizamnaməsinə və beynəlxalq qərarlara açıq təcavüzə əsaslanan yanaşmasının davamı olduğu bildirilib.
Açıqlamada həmçinin qeyd olunub ki, “İsrailin əsassız iddiaları və təhrikedici bəyanatları ərəb dövlətlərinin qanuni haqlarına zərər yetirə bilməz” və beynəlxalq ictimaiyyət bu cür təxribatlara qarşı birgə hərəkət etməyə çağırılıb, çünki bu təxribatlar bölgəni daha çox zorakılığa və xaosa sürükləyir.
Fələstin Prezident Administrasiyasının açıqlamasında isə Netanyahunun sözləri “beynəlxalq qərarların və beynəlxalq hüququn pozulması, dövlətlərin suverenliyinə və regionun təhlükəsizliyi və sabitliyinə qarşı hücum” kimi qiymətləndirilib.
Açıqlamada, bu bəyanatların qəbuledilməz olduğu və İsrailin ekspansionist və müstəmləkəçi siyasətinin bölgənin təhlükəsizliyi və sabitliyini təhdid etdiyi qeyd olunub.
Yəmən Xarici İşlər Nazirliyinin açıqlamasında isə “İsrail Baş naziri tərəfindən 'Böyük İsrail' vizyonu ilə öyünməsinin” şiddətlə qınandığı bildirilib.
Bu bəyanatın “beynəlxalq hüququn açıq şəkildə pozulması və beynəlxalq ictimaiyyətin iradəsinə açıq meydan oxuma” olduğu vurğulanıb. Açıqlamada, İsrailin bu siyasətlərini davam etdirməsinin regionu daha da gərgin və sabitlikdən uzaq vəziyyətə gətirəcəyi xəbərdarlığı edilib.
Qeyd edək ki, İsrail Baş naziri Benyamin Netanyahu, özünün tarixi və mənəvi bir missiyanı yerinə yetirdiyini iddia edərək, işğal altındakı Fələstin torpaqlarını da əhatə edən “Böyük İsrail” vizyonuna sadiq olduğunu bildirib.
“Böyük İsrail” ifadəsi, Sionist Revizionist hərəkatının qurucusu və hakim Likud partiyasının ideya müəllifi hesab edilən Zeev Jabotinsky də daxil olmaqla bəzi sionistlər tərəfindən, müasir İsrail dövləti ilə yanaşı işğal altındakı Qəzza Zolağı, İordan çayının qərb sahili və İordaniya ərazilərini ifadə etmək üçün istifadə olunur.
