BAKI, AzerVoice, Nailə Babazadə
İsrail ordusunun 7 oktyabr 2023-cü ildən bəri Qəzza zolağına həyata keçirdiyi hücumlarda həyatını itirənlərin sayı son 24 saatda 54 nəfər artaraq 61 min 776 nəfərə çatıb.
AzerVoice xəbər verir ki,Qəzzədəki Fələstin Səhiyyə Nazirliyinin verdiyi yazılı açıqlamada, İsrailin davam edən hücumları nəticəsində baş verən can itkiləri və yaralılarla bağlı son məlumatlar paylaşılıb.
Son 24 saat ərzində Qəzza zolağındakı xəstəxanalara 54 nəfərin meyiti və 831 yaralı gətirildiyi bildirilib.
İsrail ordusunun, 19 yanvarda əldə edilmiş atəşkəsi pozaraq 18 martdan etibarən həyata keçirdiyi hücumlarda 10 min 251 fələstinlinin həyatını itirdiyi, 42 min 865 nəfərin isə yaralandığı qeyd olunub.
Qəzzədə İsrail və ABŞ tərəfindən idarə edilən guya yardım məntəqələrində fələstinlilərin hədəf alındığı sistematik hücumlarda 27 maydan bu yana min 881 nəfər ölüb, 13 min 863 nəfər isə yaralanıb.
İsrailin aclığı alətə çevirdiyi Qəzza zolağında son 24 saatda 4 fələstinli aclıqdan dünyasını dəyişib. Aclıqdan ölənlərin ümumi sayı 106-sı uşaq olmaqla 239 nəfərə yüksəlib.
İsrailin 7 oktyabr 2023-cü ildən bu yana Qəzzəyə həyata keçirdiyi hücumlar nəticəsində həyatını itirənlərin ümumi sayı 61 min 776 nəfər, yaralananların sayı isə 154 min 906 nəfər olaraq qeyd olunur.
Qəzza zolağında dağıntılar altında hələ də minlərlə meyitin olduğu bildirilir.
