BAKI, AzerVoice, Nərmin Ağayeva
Livan baş naziri Netanyahunun "Böyük İsrail" bəyanatlarını rədd edib.
AzerVoice xəbər verir ki, Livanın baş naziri Navaf Salam İsrailin baş naziri Benyamin Netanyahunun qondarma “Böyük İsrail” bəyanatlarını rədd edib və bu açıqlamaların ərəb ölkələrinin milli təhlükəsizliyinə birbaşa təhdid olduğunu bildirib.
Əmmanda İordaniya kralı II Abdullah və hökumət rəsmiləri ilə görüşən Salam qeyd edib ki, Livan digər ərəb və islam ölkələri ilə birlikdə Netanyahunun “Böyük İsrail” planını qətiyyətlə rədd edir. Onun sözlərinə görə, İsrailin bəyanatları beynəlxalq hüququn açıq şəkildə pozulmasıdır. Baş nazir həmçinin Qəzzada davam edən zorakılıqları, məcburi köçkün siyasətini və fələstinlilərə qarşı qətliamları pisləyərək, beynəlxalq ictimaiyyəti Fələstin xalqını qorumağa çağırıb.
İordaniya kralı II Abdullah isə görüş zamanı Livanın təhlükəsizliyi və suverenliyinin qorunmasında dəstəyini ifadə edib, iqtisadi və siyasi əməkdaşlığın genişləndirilməsinin zəruriliyini vurğulayıb.
Qeyd edək ki, avqustun 13-də İsrailin ifrat sağçı maliyyə naziri Bezalel Smotrich işğal olunmuş Şərqi Qüdsdə “E1” məskunlaşma layihəsinin təsdiqini planlaşdırdıqlarını açıqlayıb. Netanyahu isə həmin bəyanatdan sonra tarixi və mənəvi missiya olaraq işğal olunmuş əraziləri də əhatə edən “Böyük İsrail” vizyonuna sadiq olduğunu bildirib.
