BAKI, AzerVoice, Nailə Babazadə
Qətər dövlətinin əmiri Şeyx Təmim bin Həməd Al Tani İsraili Qəzza zolağında soyqırım törətməkdə ittiham edib. O bildirib ki, bölgədə baş verənlər “bütün beynəlxalq qanun və normaların açıq şəkildə pozulmasıdır.”
AzerVoice xəbər verir ki, Əmir bu fikirləri çərşənbə axşamı günü Qətər Şura Məclisinin yeni iclas ilinin açılışında səsləndirib. O vurğulayıb ki, “Qəzza sektoru vahid Fələstin dövlətinin ayrılmaz hissəsidir” və Qətər İsrailin davamlı hücumlarını, eləcə də atəşkəs razılaşmalarının təkrar pozulmasını qəti şəkildə pisləyir.
Şeyx Təmim beynəlxalq ictimaiyyətə çağırış edib. “Biz beynəlxalq ictimaiyyəti fələstinli xalqın müdafiəsini təmin etməyə və soyqırımı törədənləri cəzasız buraxmamağa çağırırıq.”-deyə o bildirib.
O, əlavə edib ki, beynəlxalq legitimlik fələstinlilərin faciəsi ilə bağlı məsələlərdə “öz təsir gücünü itirib və hörmətini qorumaqda aciz qalıb.”
Əmir həmçinin İsrailin Qərb sahilində məskunlaşmanı genişləndirməsini, əl-Əqsa məbədinin yəhudiləşdirilməsi cəhdlərini və vasitəçi rolunu yerinə yetirən dövlətə qarşı hücumlarını sərt tənqid edib.
“İsrail artıq beynəlxalq qaydaları aşaraq vasitəçilik rolu oynayan bir dövlətə – Qətərə – qarşı da hücuma keçib. Bu, dövlət terrorudur.”-deyə o vurğulayıb.
Şeyx Təmim çıxışında qeyd edib ki, Qətər vasitəçilik və humanitar fəaliyyətlərdə mühüm rol oynayır və bu, ölkənin beynəlxalq nüfuzunu və dayanıqlığını daha da gücləndirib.
Əmir bildirib ki, son illərdə Qətərin suverenliyinə iki dəfə müdaxilə edilib – biri İran, digəri isə İsrail tərəfindən – lakin ölkə “hər iki hücumdan daha güclü və daha müqavimətli şəkildə çıxıb.”
