BAKI, AzerVoice, Nailə Babazadə
Ümumdünya Səhiyyə Təşkilatının (ÜST) baş direktoru Tedros Adhanom Gebreyesus xəbərdarlıq edib ki, Qəzza zolağı “nəsillər boyu davam edəcək” miqyasda səhiyyə fəlakəti yaşayır.
AzerVoice xəbər verir ki, Tedros “BBC” telekanalına açıqlamasında bildirib ki, Qəzza əhalisinin mürəkkəb ehtiyaclarını qarşılamaq üçün humanitar yardımların miqyası kəskin şəkildə artırılmalıdır.
O, Qəzzada atəşkəsin əldə edilməsini alqışlasa da, atəşkəsdən sonra artan yardımın hələ də səhiyyə sisteminin bərpası üçün kifayət etmədiyini vurğulayıb.
Tedrosun sözlərinə görə, Qəzza sakinləri aclq, ağır yaralanmalar, dağılmış səhiyyə sistemi və içməli su infrastrukturunun dağıdılması nəticəsində yayılan xəstəliklər kimi çoxsaylı fəlakətlərlə üz-üzədirlər.
“Bundan əlavə, humanitar yardımın çatdırılmasına məhdudiyyətlər var. Bu, tamamilə dağıdıcı bir vəziyyətdir və vəziyyəti təsəvvürəgəlməz dərəcədə fəlakətli edir,” - deyə ÜST rəhbəri bildirib.
O əlavə edib ki, aclıq və psixoloji sağlamlıq böhranı birlikdə uzunmüddətli humanitar böhrana səbəb olacaq.
“Əgər aclığı, Qəzzada artıq geniş yayılan psixi sağlamlıq böhranı ilə birlikdə nəzərdən salsaq, qarşımızda nəsillər boyu davam edəcək bir fəlakət görərik.”-deyə o qeyd edib.
BMT-nin Dünya Ərzaq Proqramı (WFP) məlumat verib ki, 10 oktyabrdan bəri 6 700 tondan çox ərzaq daşıyan yük maşınları Qəzzaya daxil olub, lakin bu göstərici hələ də gündəlik 2 000 ton məqsədindən çox aşağıdır.
Tedrosun sözlərinə görə, Qəzzaya gündə ən azı 600 yardım maşını daxil olmalıdır, halbuki hazırda bu rəqəm 200–300 arasında dəyişir.
ÜST rəhbəri İsraili yardımın çatdırılmasına heç bir şərt qoymamağa çağırıb və humanitar yardımın “genişmiqyaslı münaqişədən ayrılması” zərurətini vurğulayıb.
O bildirib ki, mövcud bütün sərhəd keçidlərinin açıq qalması, həmçinin daha əvvəl qeydiyyatı rədd edilən beynəlxalq yardım təşkilatlarının Qəzzəyə qayıtmasına icazə verilməsi vacibdir.
“Əgər yerli icra imkanına malik olanlar sahədə iştirak edə bilmirsə, genişmiqyaslı cavab tədbiri mümkün deyil,” - deyə Tedros qeyd edib.
Tedros əlavə edib ki, Qəzzanın səhiyyə sistemini bərpa etmək üçün nəzərdə tutulan tibbi avadanlıq və materiallar sərhəddə müsadirə edilir, çünki İsrail tərəfi onların “hərbi məqsədlərlə istifadə oluna biləcəyi” iddiasını irəli sürür.
