BAKI, AzerVoice, Nailə Babazadə
İsrail ordusu Qəzza zolağında təxminən 14 saat davam edən intensiv hava və artilleriya hücumlarından sonra atəşkəsin bərpa olunduğunu elan edib.Hücumlar nəticəsində 100-dən çox fələstinli həlak olub.
AzerVoice xəbər verir ki, “Əl-Arabi” telekanalının Qüdsdəki müxbiri Əhməd Dəravişənin məlumatına görə, İsrail ordusu Qəzzada müxtəlif müqavimət qruplarına məxsus 30 komandanı hədəf aldığını iddia edir. Ordunun açıqlamasında bildirilir ki, hücumlar “yüksək səviyyəli liderləri” zərərsizləşdirmək məqsədi daşıyıb.
Hücumlar Qəzzanın şimal, mərkəz və cənub bölgələrini əhatə edib. Fələstin Səhiyyə Mənbələri ən azı 100 nəfərin şəhid olduğunu təsdiqləyib. Ordunun bəyanatında İsrailin razılaşmanın pozulmasına cavab olaraq əməliyyat keçirdiyi, gələcəkdə də hər hansı pozuntuya güc tətbiq edəcəyi vurğulanıb. Tel-Əviv tərəfi atəşkəsi pozan tərəfin Həmas olduğunu iddia edir.
İsrailin “Kanal 15” telekanalının məlumatında bildirilir ki, hücumlar ABŞ tərəfindən yönləndirilməyib və sırf İsrail qərarına əsaslanıb. Kanalın iddiasına görə, əməliyyatların dayandırılmasına səbəb “Qəzzada hədəflər bankının tükənməsi” olub.
