İsrail Misir sərhədini bağlı hərbi zona elan etdi

İsrail Müdafiə naziri İsrael Katz cümə axşamı bildirib ki, Misir sərhədində yerləşən ərazinin pilotsuz uçuş aparatları (PUA) vasitəsilə silah qaçaqmalçılığına qarşı mübarizə aparmaq məqsədilə bağlı hərbi zona elan edilməsi barədə orduya göstəriş verib.

6 Noyabr 2025 16:51

BAKI, AzerVoice, Nailə Babazadə

AzerVoice xəbər verir ki, Katz açıqlamasında deyib: “Misir–İsrail sərhədi boyunca yerləşən ərazinin bağlı hərbi zona elan edilməsini və ölkə təhlükəsizliyini təhdid edən pilotsuz aparat təhlükəsinə qarşı hərbi təmas qaydalarının uyğun şəkildə dəyişdirilməsini ordudan tələb etdim.”

Nazir əlavə edib ki, PUA-larla silah qaçaqmalçılığı Qəzzadakı müharibənin bir hissəsidir və bu yolla İsrailin düşmənlərinə silah ötürülür..

İsrail və Misir arasında təxminən 200 kilometrlik sərhəd mövcuddur.

İsrail ordusunun məlumatına görə, bazar günü qərbdən İsrail ərazisinə daxil olan və səkkiz ədəd silah daşıyan bir pilotsuz aparat aşkar edilərək zərərsizləşdirilib.
Çərşənbə axşamı isə ordunun daha bir dronu — on tapança daşıyan və şərq istiqamətindən ölkə ərazisinə daxil olan aparatı — ələ keçirdiyi bildirilib.

İsrailin ifrat sağçı milli təhlükəsizlik naziri İtamar Ben Qvir isə sosial şəbəkə hesabında Katzın qərarını alqışlayaraq, sərhəddə baş verən qaçaqmalçılığın “terror məqsədlərinə xidmət etdiyini” deyib.