BAKI, AzerVoice, Orxan Qədirzadə
ABŞ-ın BMT-dəki səfiri Mayk Uoltz şənbə günü Yaxın Şərqə səfərə başlayır.
AzerVoice xəbər verir ki, səfərin məqsədi Prezident Donald Trampın Qəzza üzrə 20 maddəlik sülh planını təşviq etmək və BMT Təhlükəsizlik Şurasının 2803 saylı qətnaməsinin icrasına dəstək verməkdir.
Uoltz 6–10 dekabr tarixlərində İordaniya və İsraildə yüksək səviyyəli görüşlər keçirəcək. İordaniyada Kral II Abdullah və XİN rəhbəri Ayman Safadi ilə ikitərəfli əməkdaşlıq, Qəzzaya humanitar yardımın koordinasiyası və regional sabitlik məsələlərini müzakirə edəcək. Səfir həmçinin humanitar təşkilatlarla görüşəcək və suriyalı qaçqınlara yardım proqramlarını qiymətləndirəcək.
İsraildə Uoltz Baş nazir Benyamin Netanyahu və Prezident İsaak Hersoq ilə BMT-də ABŞ–İsrail koordinasiyası və təhlükəsizlik prioritetləri barədə danışıqlar aparacaq. O, İsrailin şimal və cənub sərhədlərinə baş çəkərək 2803 saylı qətnamənin icrasına dair brifinqlər keçirəcək, Kərəm Şalom keçid məntəqəsində humanitar yardım axınını qiymətləndirəcək və Qəzza Monitorinq və Koordinasiya Mexanizminin fəaliyyətini araşdıracaq.
Səfər çərçivəsində Uoltz Fələstin üzrə BMT nümayəndəsi Ramiz Aləkbərovla da görüşəcək, bölgədəki humanitar fəaliyyətlər və sülh təşəbbüslərini müzakirə edəcək.
ABŞ missiyası bildirib ki, səfər Prezident Trampın “regiondakı münaqişələri bitirmək” öhdəliyini əks etdirir.
