BAKI, AzerVoice, Orxan Qədirzadə
İsrailin xarici işlər naziri Gideon Saar Qərb ölkələrində antisemitizmin artması fonunda yəhudiləri İsrailə köçməyə çağırıb.
AzerVoice-un məlumatına görə, Saar bu çağırışı yəhudi Hanukka bayramının son günü münasibətilə keçirilən mərasimdə səsləndirib. Onun sözlərinə görə, yəhudilərin bütün dünyada təhlükəsiz yaşamaq hüququ olsa da, mövcud vəziyyət ciddi narahatlıq doğurur.
Nazir bildirib ki, antisemitizmin artması yəhudilərin təhlükəsizliyinə birbaşa təhdid yaradır və tarixi təcrübə bu cür proseslərin nəticələrini açıq şəkildə göstərir. O, İngiltərə, Fransa, Avstraliya, Kanada və Belçikada yaşayan yəhudiləri İsrailə köçməyə çağırıb.
Bu bəyanat Avstraliyanın Sidney şəhərində yəhudi icmasının tədbiri zamanı baş verən silahlı hücumdan bir həftə sonra səsləndirilib. Avstraliya rəsmiləri dekabrın 14-də Bondi çimərliyində keçirilən Hanukka tədbirinə hücumun İŞİD ideologiyasından ilhamlandığını açıqlayıblar.
Qeyd edək ki, Qəzza zolağında müharibənin başlamasından sonra İsrail rəsmiləri Qərb ölkələrində antisemitizm hallarının artdığını bildirir və bu ölkələrin hökumətlərini yəhudi icmalarının təhlükəsizliyini təmin etmək üçün yetərli addımlar atmamaqda ittiham edirlər.
Bundan əvvəl İsrailin baş naziri Benyamin Netanyahu da Qərb ölkələrini yəhudi icmalarının təhlükəsizliyini gücləndirməyə çağırıb. O, hökumətlərin antisemitizmə qarşı daha sərt tədbirlər görməsinin vacibliyini vurğulayıb.
Xatırladaq ki, İsrailin 1950-ci ildə qəbul edilmiş “Qayıdış Qanunu”na əsasən, dünyadakı bütün yəhudilər, eləcə də ən azı bir yəhudi nənə və ya babası olan şəxslər İsrailə köçərək vətəndaşlıq əldə etmək hüququna malikdirlər.
