BAKI,AzerVoice, Nailə Babazadə
Suriya ordusu ölkədə Suriya Demokratik Qüvvələri (SDQ) adı altında fəaliyyət göstərən PKK/YPG terror təşkilatına məxsus Hələb şəhərindəki Şeyx Maksud və Əşrəfiyyə məhəllələrində yerləşən bütün mövqelərin qanuni hədəf elan edildiyini açıqlayıb.
AzerVoice xəbər verir ki, bu qərar PKK/YPG-nin Hələb şəhərinin müxtəlif məhəllələrinə və mülki əhaliyə qarşı çoxsaylı hücumlar həyata keçirməsi səbəbilə qəbul edilib.
Əməliyyatlar Komandanlığı Şeyx Maksud və Əşrəfiyyə məhəllələrində yaşayan mülki şəxslərə PKK/YPG-yə aid mövqelərdən dərhal uzaq durmaq çağırışı edib. Mülki əhalinin təhlükəsizliyini təmin etmək məqsədilə bölgədə iki humanitar təhlükəsiz keçid dəhlizinin açıldığı bildirilib.
Açıqlamaya əsasən, “Əvarid–Zuhur prospekti keçidi” saat 15:00-dək açıq olacaq.
Qeyd edək ki,yanvarın 6-da Hələb şəhər mərkəzində PKK/YPG tərəfindən həyata keçirilən hücumlar nəticəsində 1 hərbçi və 5 mülki şəxs həlak olub, 31 nəfər yaralanıb.
Bundan sonra Suriya ordusu PKK/YPG ilə təmas xətlərinə onlarla tank, zirehli personal daşıyıcısı və əlavə hərbi qüvvələr göndərib.
Davam edən toqquşmalar səbəbilə şəhər mərkəzində dövlət qurumlarının fəaliyyəti dayandırılıb, məktəblərdə və universitetlərdə tədrisə fasilə verilib. Eyni zamanda Hələb Beynəlxalq Hava Limanında uçuşlar müvəqqəti olaraq dayandırılıb.
PKK/YPG terror təşkilatı həmin gün axşam saatlarında Süryani məhəlləsində yerləşən bir məktəb və xəstəxananı da hədəf alıb.
