BAKI, AzerVoice, Nailə Babazadə
Suriya ordusu Hələbin şərq kəndlərində yerləşən Dəyr-Hafir bölgəsi üzərində tam hərbi nəzarəti təmin etdiyini elan edib. Bu uğurlu irəliləyişin ardınca ordu bölmələri Rəqqaya daxil olaraq vilayətin qərbindəki Dibsi-Afnan qəsəbəsini nəzarətə götürüb.
AzerVoice xəbər verir ki, Fərat çayının qərbində terror təşkilatı YPG/SDG-nin işğalı altında olan bölgələrə qarşı genişmiqyaslı əməliyyat başladan Suriya ordusu, Dəyr-Hafirdə terrorçuların yerləşdiyi nöqtələrin xəritəsini paylaşıb. Ordu rəhbərliyi mülki şəxslərə müraciət edərək bu hədəflərdən uzaq durmağa çağırıb. Xəbərdarlıqdan dərhal sonra Dəyr-Hafir və Məskənə xəttində müəyyən edilmiş hədəflər intensiv atəşə tutulub. Ordunun qətiyyətli hücumları qarşısında YPG/SDG qruplaşmasının rəhbəri Abdi Hələbdən çəkilmə qərarı aldıqlarını açıqlayıb.
Suriya Rəsmi Xəbər Agentliyi SANA-nın məlumatına görə, ordunun ilk hərbi birlikləri artıq Fəratın qərbindəki strateji nöqtələrə daxil olub. Dəyr-Hafir və Məskənəni tam nəzarətə götürən Suriya ordusu hazırda Rəqqanın cənub-qərbində yeni istehkamlar quraraq mövqelərini möhkəmləndirməyə davam edir.
