BAKI, AzerVoice, Nailə Babazadə
İsrail rəhbərliyi ABŞ administrasiyasının çağırışlarına rəğmən, Qəzza zolağının Misir ilə sərhədində yerləşən Rəfah Sınır Qapısını qapalı saxlamaq qərarına gəlib.
AzerVoice xəbər verir ki,"Yedioth Ahronot" qəzetinin yüksək rütbəli İsrail rəsmisinə istinadən verdiyi məlumata görə, bazar günü axşam saatlarında toplanan İsrail Təhlükəsizlik Kabineti sərhəd keçid məntəqəsinin fəaliyyətinin bərpa edilməməsi barədə yekdil qərar qəbul edib.
İsrail rəsmisi bildirib ki, ABŞ-ın atəşkəsin ikinci mərhələsinə keçildiyini elan etməsinə baxmayaraq, Tel-Əviv administrasiyası strateji mövqeyini dəyişməyib. İsrail tərəfi daha əvvəl bəyan etmişdi ki, 7 oktyabr 2023-cü il döyüşlərində həlak olan hərbçi Ran Qvilinin cənazəsi təhvil verilmədən Rəfah keçid məntəqəsinin açılmasına icazə verilməyəcək. Qeyd edək ki, Qəzzanın İsrail xaricində dünyaya açılan yeganə qapısı olan bu məntəqə 2024-cü ilin may ayından bəri İsrail ordusunun işğalı altındadır.
Xəbərdə həmçinin Vaşinqton və Tel-Əviv arasında idarəetmə ilə bağlı yaranan gərginliyə də toxunulub. İsrail rəsmisinin iddiasına görə, Qəzza İdarəetmə Şurasına Türkiyə və Qətərdən olan nümayəndələrin daxil edilməsi tərəflər arasında əvvəllər əldə olunmuş razılaşmada yer almayıb. Bu məqam ABŞ və İsrail arasında regional tərəfdaşlıq məsələsində yeni bir fikir ayrılığının yarandığını göstərir.
