BAKI,VOA, Nailə Babazadə
Fələstin hökuməti beynəlxalq birliyi İordan çayının qərb sahilində fələstinlilərin torpaqlarını qəsb edən israillilərin artan hücumlarını dayandırmaq üçün çəkindirici tədbirlər görməyə çağırıb və bu hücumların sahədəki vəziyyətə ciddi təsirləri olacağı barədə xəbərdarlıq edib.
VOA xəbər verir ki, həftəlik kabinet iclasından sonra hökumətdən edilən açıqlamada, bu hücumların "işğalçı hakimiyyətin himayəsi altında törədilən mütəşəkkil cinayətlər" olduğu, fələstinlilər üçün düşmən mühit yaratmaq və yaşayış məntəqələrini genişləndirmək məqsədi daşıdığı bildirilib. Qeyd olunub ki, son hücumlardan biri bazar ertəsi sübh vaxtı Nablusun cənubundakı Lubban əş-Şərqiyyə və Kusra kəndlərində baş verib, nəticədə yaralananlar olub, evlər və fələstinlilərə məxsus əmlaklar yandırılıb.
Hökumət həmçinin radikal yəhudilərin Məscidül-Əqsanın həyətinə daxil olmasına icazə verildiyi halda, müsəlmanların ibadətinə qoyulan məhdudiyyətlərin davam etdirilməsini "ibadət azadlığına açıq hücum" kimi qiymətləndirərək pisləyib.
Bəyanatda beynəlxalq qurumlara və vasitəçilərə müraciət edilərək, Qəzza zolağında hücumların dayandırılması, atəşkəs razılaşmasının ikinci mərhələsinin icrası və İsrail qüvvələrinin Qəzzadan çıxarılması üçün təzyiqlərin artırılması tələb olunub. Bundan əlavə, bölgədə epidemiya riskinə qarşı Ümumdünya Səhiyyə Təşkilatından gəmiricilərə qarşı mübarizə ləvazimatlarının Qəzzaya daxil olmasına icazə verilməsi üçün təcili müdaxilə istənilib. Təxminən bir milyon fələstinlinin son dərəcə ağır humanitar şəraitdə yaşadığı vurğulanıb.
