BAKI,VOA, Nailə Babazadə
İsrail ordusunun martın 2-dən bəri Livana qarşı həyata keçirdiyi hücumlarda həyatını itirənlərin sayı son 24 saat ərzində 35 nəfər artaraq 2 min 124-ə çatıb.
VOA xəbər verir ki, Livan Səhiyyə Nazirliyinin verdiyi məlumata görə, hücumlar nəticəsində yaralananların ümumi sayı isə 6 min 921 nəfərə yüksəlib. Həlak olanlar arasında 168 uşaq və 254 qadın var.
Səhiyyə sektoruna dəyən zərər də ağır olaraq qalır. Belə ki, İsrailin hücumları nəticəsində 88 tibb işçisi həyatını itirib, 206 nəfər isə yaralanıb. Həmçinin 6 xəstəxana fəaliyyətini tamamilə dayandırıb və 102 təcili tibbi yardım maşını istifadəyə yararsız hala düşüb. Livan hökuməti ölkə daxilində didərgin düşmüş insanların sayının 1 milyon 162 min nəfəri keçdiyini, İsrailin isə hava və dəniz hücumları ilə yanaşı quru əməliyyatlarını genişləndirməyə davam etdiyini açıqlayıb.
