BAKI,VOA, Orxan Qədirzadə

ABŞ administrasiyası İraqa nağd dollar göndərişlərini müvəqqəti dayandırıb və təhlükəsizlik sahəsində əməkdaşlıq proqramlarının bir hissəsini dondurub.

VOA xəbər verir ki, bu addımın məqsədinin Bağdadı İranla əlaqəli silahlı qrupların ləğvinə təşviq etmək olduğu bildirilir.

Məlumata görə, ABŞ Maliyyə Nazirliyi İraqın neft satışından əldə etdiyi vəsaitlər çərçivəsində Nyu-Yorkdakı Federal Ehtiyat Sistemindən göndərilməsi nəzərdə tutulan təxminən 500 milyon dollar həcmində nağd pul daşınmasını dayandırıb.

ABŞ Dövlət Departamentinin nümayəndələri bildiriblər ki, İraq hökumətinin silahlı qrupların hücumlarının qarşısını almaqda uğursuzluğu Vaşinqton–Bağdad münasibətlərinə mənfi təsir göstərir. ABŞ tərəfi İraqdan bu istiqamətdə təcili addımlar gözlədiyini vurğulayıb.

Eyni zamanda qeyd olunub ki, Vaşinqton bəzi terrorla mübarizə proqramlarının və hərbi təlimlərin maliyyələşdirilməsini də dayandırmaq niyyətindədir. Bu qərarın İraqda fəaliyyət göstərən İran yönlü qrupların hücumları ilə əlaqəli olduğu bildirilir.

Xatırladılıb ki, ABŞ daha əvvəl Bağdadda yerləşən diplomatik obyektə pilotsuz uçuş aparatı ilə hücumdan sonra İraq səfirini izahat üçün çağırmışdı.

Bu qərarın İraq iqtisadiyyatına və təhlükəsizlik balansına ciddi təsir göstərə biləcəyi qeyd olunur.