BAKI,VOA Orxan Qədirzadə
2026-cı il “Avroviziya” mahnı müsabiqəsinin ilk yarımfinal mərhələsində İsraili təmsil edən müğənni Noam Bettan səhnə çıxışı zamanı etirazla qarşılaşıb.
VOA xəbər verir ki, müsabiqənin 70-ci yubiley tədbiri bu il Vyana şəhərində yerləşən “Viner Ştadthalle” arena kompleksində keçirilib. İlk yarımfinal zamanı səhnəyə çıxan İsrail təmsilçisi tamaşaçıların etirazı ilə üzləşib.
Zalda iştirak edən bəzi şəxslər “Soyqırımı dayandırın” şüarları səsləndirib, Fələstin bayraqları qaldıraraq Qəzza əhalisi ilə həmrəylik nümayiş etdiriblər. Bildirilir ki, səsləndirilən şüarlar canlı yayım zamanı da eşidilib.
Etirazçılar üzərlərində “Azad Fələstin” yazıları daşıyıb, bəzi şəxslər isə salon əməkdaşları tərəfindən zaldan çıxarılıb. Yarımfinal öncəsi də Vyana küçələrində İsrailin yarışmada iştirakına qarşı aksiyalar keçirilib və şəhərdə gücləndirilmiş təhlükəsizlik tədbirləri görülüb.
Müsabiqənin ilk yarımfinal mərhələsində 15 ölkə çıxış edib. Səsvermənin nəticələrinə əsasən Yunanıstan, Finlandiya, Belçika, İsveç, Moldova, İsrail, Serbiya, Xorvatiya, Litva və Polşa final mərhələsinə yüksəlib.
Portuqaliya, Gürcüstan, Monteneqro, Estoniya və San Marino isə yarışmanı tərk edib.
Məlumata görə, ikinci yarımfinal mayın 14-də, final mərhələsi isə mayın 16-da keçiriləcək.
Bəzi Avropa ölkələri isə İsrailin yarışmada iştirakına etiraz olaraq alternativ proqramlar yayımlayıb. Brüsseldə “Fələstin üçün birlik – soyqırıma səhnə yoxdur” adlı alternativ konsert təşkil olunub.
Sloveniya Radio və Televiziyası isə “Fələstinin səsləri” adlı xüsusi yayım çərçivəsində Qəzzadan bəhs edən sənədli filmlər nümayiş etdirib.
Digər tərəfdən, İsrail təmsilçisi Noam Bettanın “İsrailə 10 dəfə səs verin” çağırışı etdiyi videolar da müzakirələrə səbəb olub. “Avroviziya” müsabiqəsinin direktoru Martin Qrin bunun yarışma qaydalarına zidd olduğunu bildirib və İsrailin ictimai yayım qurumuna rəsmi xəbərdarlıq göndərildiyini açıqlayıb.
Xatırladaq ki, Avropa Yayım Birliyi Rusiyanı 2022-ci ildən müsabiqədən uzaqlaşdırsa da, İsrailə qarşı eyni qərarı qəbul etməməsi səbəbindən “ikili standart” tənqidləri ilə üzləşib.
Bu qərardan sonra İspaniya, Sloveniya, İrlandiya, İslandiya və Niderland yarışmanı boykot etmək qərarı verib.
Bundan əlavə, 2024-cü il “Avroviziya” qalibi olan İsveçrəli sənətçi Nemo və 1994-cü ilin qalibi Charlie McGettigan də İsrailin iştirakına etiraz olaraq mükafatlarını geri qaytaracaqlarını açıqlayıblar.
