BAKI,VOA Orxan Qədirzadə
Beynəlxalq insan haqları təşkilatının baş katibi Anyes Kallamar İsrail hakimiyyətini Qəzza zolağındakı Kamal Ədvan xəstəxanasının direktoru Hüssam Əbu Safiyanı azad etməyə çağırıb.
Çağırış Hüssam Əbu Safiyanın İsrailin Nafha həbsxanasında təkadamlıq kameraya köçürüldüyünə dair məlumatların yayılmasından sonra səsləndirilib.
Anyes Kallamar sosial şəbəkədə paylaşdığı açıqlamada İsrail hakimiyyətinin hərəkətlərini sərt tənqid edib.
“Bu qədər qəddarlıq niyə? İsrail hakimiyyətini bu cür davranışlarına görə məsuliyyətə cəlb etmək gücünə malik olanlar niyə təkrar-təkrar uğursuz olurlar?” – deyə o bildirib.
Kallamar vurğulayıb ki, Hüssam Əbu Safiya ailəsinin yanında olmalı və tibbi bilik və bacarıqlarına ehtiyacı olan insanlara yardım göstərməlidir.
Onun sözlərinə görə, həkimin olmalı olduğu son yer təkadamlıq kamera şəraitidir.
Qeyd edək ki, Hüssam Əbu Safiya Qəzza zolağının şimalında yerləşən Kamal Ədvan xəstəxanasının direktorudur və bölgədəki səhiyyə sisteminin fəaliyyətində mühüm rol oynayan tibb mütəxəssislərindən biri hesab edilir.
