Bakı, AzerVoice
Misir prezidenti Əbdülfəttah Əs-Sisi bu gün Qəzza zolağının yenidən qurulmasına başlamağın vacibliyini vurğulayıb və bu istiqamətdə Qahirənin hərtərəfli bir plan hazırladığını bildirib.
AzerVoice xəbər verir ki, bu açıqlama, ABŞ prezidenti Donald Trampın ABŞ-ın Qəzzanı ələ keçirməsi və sakinlərin məcburi köçürülməsi ilə bağlı təklifinə cavab olaraq verilib.
Sisi həmçinin, bütün tərəflərin atəşkəsin qorunub saxlanması üçün məsuliyyətli davranmalı olduğunu vurğulayıb və münaqişənin davam etməsinin hər iki tərəfə zərər verəcəyini bildirib. O, həmçinin 4 iyun 1967-ci il sərhədləri çərçivəsində, paytaxtı Şərqi Qüds olmaqla müstəqil Fələstin dövlətinin yaradılmasının bölgədə daimi sülhün təmin olunmasının yeganə yolu olduğunu qeyd edib.
Qeyd edək ki, Tramp son iki həftədə təəccüb doğuran bir təklif irəli sürərək ABŞ-ın Qəzza zolağını nəzarətə götürəcəyini, dağıdılmış əraziləri yenidən quraraq onları "Yaxın Şərqin Rivierasına" çevirəcəyini bildirmişdi. O, fələstinlilərin başqa yerə köçürülməsini təklif etsə də, onların geri qayıtması üçün heç bir plan təqdim etməyib. Bu təklif həm regional, həm də beynəlxalq səviyyədə geniş etirazlarla qarşılanıb və ərəb ölkələrinin ortaq mövqe sərgiləməsinə səbəb olub.
Son günlər ərzində nüfuzlu ərəb dövlətləri diplomatik səylərini gücləndirərək Trampın təklifinin və fələstinlilərin torpaqlarından çıxarılmasının rədd edildiyini vurğulayıblar. Misir də sonradan bəyan edib ki, fələstinlilərin öz torpaqlarında qalmasını təmin edən hərtərəfli bərpa planı təqdim edəcək.
