BAKI,AzerVoice

Ukrayna Prezidenti Volodimir Zelenski bildirib ki, Ukraynadakı müharibənin sona çatdırılması məqsədilə ABŞ nümayəndə heyəti ilə danışıqlar gələn həftə Səudiyyə Ərəbistanında keçiriləcək.

AzerVoice xəbər verir ki, bir həftə əvvəl dünya Ağ Evdə ABŞ Prezidenti Donald Tramp və onun ukraynalı həmkarı Volodimir Zelenski arasında baş tutan görüş heç bir sülh təşəbbüsü ilə bağlı nəticə vermədi.

Görüş zamanı ABŞ və Ukrayna arasında nadir elementlər üzrə sazişin imzalanması planlaşdırılsa da, Ağ Ev rəsmilərinin Zelenskidən qəfil görüşü tərk etməsini istədiyi bildirilərək bu proses təxirə salındı.

Tramp, Zelenskinin sülh əldə etməkdə ciddi olmadığını iddia edərək mövqeyini davam etdirdi. Vaşinqton administrasiyası isə bu mübahisənin ardından Ukraynaya bütün hərbi və maliyyə yardımlarını, eləcə də ABŞ kəşfiyyat dəstəyini dayandırdığını elan etdi.

Zelenski cümə axşamı rəsmi Telegram kanalında paylaşdığı açıqlamada ABŞ rəsmiləri ilə danışıqlara yenidən başlamaq üçün yaxın zamanda görüşəcəyini elan edib.

Danışıqların gələn həftənin əvvəlində Səudiyyə Ərəbistanında keçirilməsi gözlənilir. Zelenski, bazar ertəsi Səudiyyə Ərəbistanının vəliəhdi Məhəmməd bin Salmanla görüşəcək. Daha sonra isə ABŞ rəsmiləri ilə görüşlər baş tutacaq.

"Gələn həftə, bazar ertəsi, vəliəhd şahzadə ilə görüşmək üçün Səudiyyə Ərəbistanına səfər etməyi planlaşdırıram. Bundan sonra komandam Səudiyyə Ərəbistanında qalaraq amerikalı tərəfdaşlarla işləməyə davam edəcək. Ukrayna sülhə ən çox maraq göstərən tərəfdir”,- deyə Zelenski bildirib.

ABŞ-ı bu danışıqlarda təmsil edəcək şəxs Orta Şərq üzrə xüsusi nümayəndə Stiv Vitkoff olacaq. Vitkoff, Tramp administrasiyasını təmsil etmək üçün Səudiyyə Ərəbistanına səfər edəcək.

"Biz hazırda ukraynalı rəsmilərlə danışıqların Riyadda və ya potensial olaraq Ciddədə keçirilməsini razılaşdırmağa çalışırıq", – deyə Vitkoff Ağ Ev bildirib.

Vitkoff həmçinin qeyd edib ki, bu görüşlər ABŞ rəsmilərinin Ukraynanın artıq real və mənalı sülh danışıqlarında iştirak etmək niyyətində olduğuna dair əsaslı səbəbləri olduğuna görə təşkil edilir.

"Prezident Zelenski Trampa məktub göndərdi. Düşünürəm ki, prezident bunu çox müsbət və irəliyə doğru atılmış addım kimi qəbul etdi",- deyə Vitkoff vurğulayıb.

Tramp da davam edən proseslə bağlı Ukraynanın razılaşma əldə etmək istədiyini, çünki "başqa seçimlərinin olmadığını" deyib.